काठमाडौं, १५ चैत । आजदेखि काठमाडौंका घर घरमा मेलम्चीको पानी बितरणको थालनी गरिँदैछ ।
चुच्चेपाटीस्थित महांकाल वितरण केन्द्रमा मेलम्चीबाट सुन्दरीजल हुँदै आइपुगेको पानी जम्मा गर्ने काम भइरहेको छ । दिउँसो १ बजेबाट पानी घर घरमा वितरण गर्ने तयारी भएको खानेपानी मन्त्रालयले जनाएको छ ।
पानी वितरण गर्ने तयारी स्वरुप यतिबेला प्रधानमन्त्रीको सरकारी निवास बालुवाटारमा प्रधानमन्त्री, खानेपानी मन्त्री, सचिव लगायतका पदाधिकारी बैठक बसिरहेका छन् ।
उपत्यकामा रहेको पानी वितरणको पुरानै नेटवर्कमार्फत पानी वितरण गर्ने तयारी गरिएको छ ।
आजको पानी वितरण सफल भएपछि मेलम्चीबाट दैनिक १७ करोड पानी काठमाडौमा नियमित रुपमा बितरण थालिनेछ ।
आज ४ करोड लिटर मेलम्चीको पानी काठमाडौंका विभिन्न ठाउँमा वितरण गर्न लागिएको हो ।
काठमाडौं उपत्यका खानेपानी लिमिटेडका अनुसार पुरानै वितरण प्रणालीबाट पानी वितरण गर्न लागिएको हो । अनामनगर घट्टेकुलो क्षेत्रका १६ सय धारामा भने नयाँ पाइपलाइनबाट पानी वितरण गरिने केयूकेएलका प्रवक्ता प्रकाश राईले जानकारी दिएका छन् ।
आगामी चैत २७ गतेदेखि मात्रै दैनिक १७ करोड लिटर पानी वितरण गरिने योजना छ । अहिले पुराना तथा नयाँ पानी संकलन तथा प्रशोधन केन्द्रका साथै नयाँ तथा पूराना वितरण प्रणालीको परीक्षण गर्ने नियमित रुपमा पानी वितरण गर्ने तयारी गरिएको छ ।
तपाईको प्रतिक्रिया