धनुषा निर्वाचन क्षेत्र नम्बर–३ मा प्रतिनिधिसभा सदस्य पदकी नेकपा एमाले उम्मेदवार जुली कुमारी महतोले ‘परिवर्तन’को नारा दिएर मतदाता भ्रमित पार्ने प्रयास भइरहेको आरोप लगाएकी छन् । जनकपुरधाम–३ मा घरदैलो कार्यक्रमका क्रममा सञ्चारकर्मीसँग कुरा गर्दै उनले नयाँ–पुरानोको बहस उठाएर परिवर्तनको वाचा गर्नु जनतालाई बरगलाउने रणनीति भएको दाबी गरिन् ।

“पहिले नै सांसद भइसकेका व्यक्तिले फेरि नयाँको नारा दिनु जनतालाई भ्रमित पार्नु हो,” उनले भनिन्, “यहाँका मतदातालाई राम्रोसँग थाहा छ—सांसद बन्नकै लागि परिवर्तनको नारा दिइँदै छ ।”

महतोले धनुषा–३ का मतदाता व्यवस्था परिवर्तनभन्दा विकासका लागि उद्देश्य र कार्यशैलीमा स्पष्टता खोजिरहेको बताइन् । देश विकासका लागि स्पष्ट र व्यवहारिक खाका नेकपा एमालेसँग मात्रै रहेको दाबी गर्दै उनले मतदाताले त्यसलाई विश्वास गरिरहेको उल्लेख गरिन् ।

घरदैलोका क्रममा स्थानीय बासिन्दाका समस्या र गुनासा सुन्दै महतोले समाधानका लागि हरसम्भव प्रयास गर्ने प्रतिबद्धता व्यक्त गरिन् । नयाँ दलहरूले ठोस नीति र दीर्घकालीन भिजन बिना पुराना दलहरूप्रति वितृष्णा फैलाउने प्रयास गरिरहेको आरोप लगाउँदै उनले एमाले संविधान रक्षा, राजनीतिक स्थिरता र राष्ट्रिय स्वाधीनताको सवालमा निरन्तर संघर्षरत दल रहेको दाबी गरिन् ।