चार वर्ष पूर्व स्थापना गरिएको राजर्षि जनक विश्वविद्यालयको सेवा आयोगले उप–प्राध्यापक पदपूर्तिका लागि दरखास्त आह्वान गरेपछि करारका शिक्षकहरुले तालाबन्दी गरेका छन् । सोमबार सेवा आयोगका अध्यक्ष प्रा।डा। शैलेन्द्र लाभको कार्यकक्ष र लेखा शाखामा करारका शिक्षकहरुले तालाबन्दी गरेका छन् ।
पेपर कोर्स कन्ट्रयाक्ट शिक्षक संघका सभापति दिलिप यादवले स्थापनाकालदेखि नै विश्वविद्यालयमा काम गर्दै आएको र कतिपय शिक्षकहरुको उमेर समेत पार भइसकेको भन्दै सेवा आयोगबाट प्रकाशित विज्ञापनको विरोध गरेका छन् ।
उनले पछिल्लो ६ महिनादेखि विभिन्न माग राख्दै आफूहरु आन्दोलनरत रहेको अवस्थामा आफूहरुको मागलाई बेवास्ता गर्दै विज्ञापन निकालिएको आरोपसमेत लगाए । उनले भने, ‘हामी यहाँ स्थापनाकालदेखि नै कार्यरत छौं, कयौँ शिक्षक साथीको उमेरसमेत पार भइसक्यो तर सेवा आयोगले त्यसको कुनै वास्ता गरेन ।’
आफूहरुले यतिका वर्षसम्म काम गरेबापत प्राप्त अनुभवको कुनै मूल्यांकन नगरिएकोले बाध्य भएर तालाबन्दी गर्नुपरेको उनले सुनाए । उनले रजिष्ट्रार, भीसी, सेवा आयोगका अध्यक्ष, सदस्यहरुलाई जानकारी गराउँदा आश्वासन दिए पनि एक्कासी विज्ञापन आह्वान गरिएकाले आफूहरुको उमेर, अनुभवलाई ग्राह्यता नदिएको देखिएपछि तालाबन्दी गरेको बताए ।
उनले केन्द्रीय कार्यालयमा उपप्राध्यापकको दरबन्दी रहेकोमा पाँच जनाको दरबन्दी राखेर २१ वटामा मात्र विज्ञापन आह्वान गरेको आरोप लगाए । विश्वविद्यालयमा अहिले भूगोल विषयको पढाई नभए पनि त्यसका लागिसमेत दरखास्त आह्वान गरिएको तर पढाई भइरहेको विषयहरुको विज्ञापन ननिकालिएको करार शिक्षकहरुको आरोप छ ।
विश्वविद्यालयले सोमबार उपप्राध्यापक पदमा २१ वटा पदका लागि विज्ञापन आह्वान गरेको छ । विश्वविद्यालयले जनस्वास्थ्य, कानुन, कम्प्युटर एप्लिकेसन, अंग्रेजी, अर्थशास्त्र, तथ्यांकशास्त्र, गणित, व्यवस्थापन, कम्प्युटर इन्जिनियरिङ, भूगोल, हेमाटोलोजीलगायत विषयको उपप्राध्यापक पदमा भर्नाका लागि विज्ञापन आह्वान गरेको छ ।
विश्वविद्यालयले कर्मचारी भर्नाका लागि प्राविधिक अधिकृतदेखि लिएर ल्याब ब्वाईसम्मका लागि १३ वटा दरबन्दीमा भर्नाका लागि विज्ञापन प्रकाशित गरेको छ ।
news/photo : ratopati.com
तपाईको प्रतिक्रिया