जनकपुरधाम, फागुन २२ गते ।
धनुषाको क्षीरेश्वरनाथ नगरपालिका–१ स्थित रमदैयामा वण्डर ल्याण्ड वाटरपार्क सञ्चालन हुन लागेको छ ।
वाटरपार्क निर्माणमा हालसम्म १२ करोड ५० लाख रुपैयाँ लागत लागेको छभने करिब ३ लाख स्क्वायर फिट क्षेत्रफलमा फैलिएको वाटरपार्क भोलीदेखि सञ्चालनमा आउन लागेको हो । (भोलि) शुक्रबार सिने जगतकी चर्चित अभिनेत्री प्रियंका कार्कींको विशेष उपस्थितिमा उद्घाटन भएपछि पार्क औपचारिक रुपमा सञ्चालनमा आउने भएका हो । वाटरपार्क मधेश प्रदेशकै सबैभन्दा ठूलो वाटरपार्क मानिन्छ ।
वाटरपार्कमा मल्टिलेनसाइड टू लेन, बडी वेभ स्लाइड, हाईस्पीड बडी स्लाइड, ओपन बडी टर्निंग स्लाइड, ओपन फ्लोट स्लाइड, वेभ पुल, रेन डान्स, फाइभ प्लैटफर्म वाटर प्लेसिस्टम, टट्स एक्टिभिटी, सिक्स डिफरेन्ट सावरजस्ता विभिन्न आकर्षक सुविधाहरू समेटिएका छन् । साथै, फूड कोर्ट, पार्टी हल लगायतका सेवा सुविधाहरू उपलब्ध गराइनेछ ।
जानकी फन पार्क एण्ड रिसोर्ट प्रा.लि.का प्रबन्ध निर्देशक गुड्डु जैनले उद्घाटन अघि बिहीबार आयोजित पत्रकार सम्मेलनमार्फत पार्कको अवस्थाबारे जानकारी गराउनुभएको थियो ।
वाटरपार्क धनुषा, महोत्तरी, सिरहा लगायत मधेश प्रदेशका विभिन्न जिल्लाका साथै सीमावर्ती क्षेत्रका पर्यटकहरूका लागि प्रमुख आकर्षण बन्ने अपेक्षा गरिएको छ। पार्क प्रत्येक दिन बिहान १०ः३० बजे खुल्नेछ र बेलुका ५ बजेसम्म सञ्चालनमा रहनेछ ।
निर्माण सम्पन्न भएको पार्कमा एकसाथ दुई हजार भन्दा बढी आगन्तुक अटाउन सक्ने क्षमता रहेको पार्कका निर्देशक अभिशेष गोयनकाले जानकारी दिनुभयो ।
उहाँका अनुसार, ग्राहकको स्वास्थ्यलाई ध्यानमा राख्दै पानीको स्वच्छता कायम गर्न चारवटा वाटर ट्रीटमेन्ट सिस्टम जडान गरिएको छ। साथै, आगन्तुकहरूका लागि न्यूनतम शुल्कमा कस्टुम उपलब्ध गराइनेछ । वाटरपार्क परिसरभित्र रेस्टुरेन्ट कम्प्लेक्स, रिसोर्ट, बैंक्वेट हल तथा बालबालिकाका लागि प्ले जोन निर्माण कार्य समेत जारी रहेको उहाँले बताउनुभयो ।
तपाईको प्रतिक्रिया