नेपाल बार एसोसिएसनले प्रधानन्यायाधीश चोलेन्द्रशमशेर जबराविरुद्धको आन्दोलनलाई थप सशक्त बनाउने भएको छ ।
बार महासचिव लीलामणि पौडेलले सर्वोच्च अदालत परिसरमा कानुन व्यवसायीमाथि भएको चरम दमन विरुद्ध आइतबारदेखि आन्दोलनलाई थप कडा पार्ने चेतावनी दिनुभयो ।
आइतबार देशभरका सबै अदालतमा बन्दी प्रत्यक्षीकरण बाहेक सबै मुद्दामा बहस पैरवी नगर्ने निर्णय बारले गरेको उहाँले बताउनुभयो । सोमबारबाट नियमित पुरानै आन्दोलनका कार्यक्रमले निरन्तरता पाउने श्रेष्ठले जानकारी दिनुभयो ।
उहाँका अनुसार सोमबार संसदमा सरिक सबै दललाई ज्ञापन पत्र बुझाउने कार्यक्रम रहेको छ । मंगलबार देशभरका सबै अदालतमा अन्तिम हदम्याद भएको मुद्दा बाहेक अरू कुनै पनि मुद्दा मामिलालगायत कुनै पनि काम नगरिने उहाँले बताउनुभयो ।
यस्तै बुधबार देशभरका १८ वटा उच्च अदालतमा केन्द्रीय प्रतिनिधि पठाएर त्यो अदालतका क्षेत्राधिकार भित्रका अरू अदालतका कानुन व्यवसायीलाई एकै ठाउँमा भेला पारेर वृहत् विरोध सभा कार्यक्रम आयोजना गरिनेछ । बिहीबार र शुक्रबार भने काठमाडौं केन्द्रित आन्दोलनलाई सशक्त बनाइने बारले निर्णय गरेको छ ।
यस्तै प्रधानन्यायाधीशले वार्ताका लागि पठाएको पत्रको कुनै अर्थ नरहेको अध्यक्ष श्रेष्ठले बताउनुभयो । प्रधानन्यायाधीशको राजीनामा मागिरहेको र बेन्चसमेत नतोक्न भनेको अवस्थामा अब वार्तामा बस्नुको कुनै अर्थ नहुने उहाँको भनाइ छ ।
तपाईको प्रतिक्रिया