किसानलाई पक्राउ गरेको विरोधमा औरही गाउपालिकामा तालाबन्दी र प्रदर्शन

सिरहाको औरही गाँउपालिकामा किसानहरुले तालाबन्दी गरेका छन् । गहुँ बीउ लुटेको आरोपमा एक जनालाई प्रहरीले पक्राउ गरेपछि किसानहरु गाउपालिकामा ताला लगाएका हुन् ।

तीन दिन अगाडी गाउपालिकाले थन्काएर राखेको साढे तीन सय बोरा गहुं बीउ लुटेका थिए । गाउपालिकाले गहुं बीउ लुटेको आरोपमा कडहरबाका मिथिलेश यादवलाई प्रहरीले पक्राउ गरेपछि किसानहरु आन्दोलित बनेका छन् ।

किसान आन्दोलनलाई जनमत पार्टीले सघाएको छ । सो पार्टीका नेता दिपेन्द्र यादवले गाउपालिकाले दिएको उजुरीको आधारमा प्रहरीले किसानलाई पक्राउ गरेकाले गाउपालिकाको कार्यालयमा तालाबन्दी गरेको बताए ।

उनले पक्राउ परेका किसानलाई रिहा नगरे अझ आन्दोलनमा उत्रिने चेतावनी दिए । उनले भने, ‘गाउपालिकाले अबिलम्ब किसानमाथि दर्ता गराएको मुद्दा फिर्ता लिओस् । होइन् भने महाविद्रोह हुन्छ ।’

प्रहरी प्रशासन र गाउपालिका अध्यक्ष सिदार्थ यादव विरुद्ध किसानहरुले नारा समेत लगाएका छन् । उनीहरुले किसान उपरको दमन बन्द कर, किसानलाई आवश्यक मल खाद र बीउको व्यवस्था गर, गिरफ्तार किसानलाई रिहा गर नारा लगाएका हुन् ।