जनकपुरधाम । नेपाली काँग्रेसको महोत्तरी जिल्ला सभापति नागेश्वर यादव विजयी भएका छन् ।
संस्थापन समूहबाट उम्मेदवार रहेका यादव दोस्रो चरणमा निर्वाचन बिना नै सहमतिमा निर्वाचित भएका हुन् ।
शनिबार घोषित मतपरिणामानुसार उनलाई दोस्रो मत प्राप्त गर्ने सुशीलकुमार यादवले समर्थन जनाएपछि यादव विजयी भएका हुन् ।
कुनै उम्मेदवारले ५१ प्रतिशत मत ल्याउन नसकेपछि दोस्रो चरणमा अन्य दुई उम्मेदवार सुशीलकुमार यादव र बजरंग नेपालीले नागेश्वर यादवलाई समर्थन गरेपछि उनलाई विजयी घोषणा गरिएको हो ।
विजयी नागेश्वरले कूल खसेको दुई हजार १३९ मतमध्ये एक हजार ११ मत प्राप्त गरेको निर्वाचन समितिले जनाएको छ । दोस्रो मत पाउने सुशीलकुमारले ७७९ र अर्का उमेदवार बजरङ्ग नेपालीले ३०६ मत प्राप्त गरेका थिए ।
सभापतिमा विजयी नागेश्वर पञ्चायतकालदेखि नै काँग्रेसमा आबद्ध भई राजनीतिमा सक्रिय रहँदै आएका हुन् । यसअघि नेपाल विद्यार्थी सङ्घको बिभिन्न जिम्मेवारी र तरुण दलको केन्द्रीय उपाध्यक्ष रहिसकेका उनी दलको १३औँ महाधिवेशनमा पनि जिल्ला सभापतिका उम्मेदवार थिए । उनी जिल्लाको लोहारपट्टी नगरपालिकाका स्थायी बासिन्दा हुन् ।
तपाईको प्रतिक्रिया