जनकपुरधाम । जिल्ला प्रहरी कार्यालय धनुषाले अटोमेटिक पेस्तोलसहित दुई जना युवकलाई पक्राउ गरेको छ ।
धनुषाको जनकपुरधाम उपमहानगरपालिकास्थित रामानन्द चोकबाट प्रादेशीक अस्पताल तर्फ गइरहेको अवस्थामा ती युवकहरुलाई धनुषा प्रहरीले पक्राउ गरेको हो ।
पक्राउ पर्नेमा महोत्तरी जिल्ला जलेश्वर नगरपालिका –९ घर भई हाल जनकपुरधाम–४ बस्ने ३० वर्षीय ईन्द्रेश कुमार सिंह र महोत्तरीकै मनरासिस्वा नगरपालिका – १ घर भई हाल जनकपुरधाम–८ बस्ने १९ वर्षीय लोटस भन्ने अभिषेक कुमार सिंह रहेका छन् ।
ज. ७ प. ७९३२ नम्बरको मोटरसाइकलमा सवार भई हातहतियार साथमा बोकी रामानन्द चोकबाट प्रादेशिक अस्पतालतर्फ गईरहेको अवस्थामा प्रहरीले उनीहरूलाई पक्राउ गरेको थियो ।
गोप्य सूचनाका आधारमा प्रहरी कार्यालय धनुषाबाट खटेको सादापोशाकको प्रहरी टोलीले चेकजाँचको क्रममा इन्द्रेशले आफ्नो बाँया साईडको कम्मरमा पेन्टको वेल्टभित्र लुकाएर राखेको अवस्थामा सो हतियार फेला परेको जिल्ला प्रहरी कार्यालय धनुषाका प्रवक्ता प्रहरी नायव उपरीक्षक जितेन्द्र कुमार बस्नेतले जानकारी दिनुभयो ।
उक्त पेस्तोल सम्बन्धमा सोधपुछ गर्दा दुवैजनाको संलग्नतामा बोकेर हिडेको भनी बताएकोमा उक्त पेस्तोल बरामद गरी उनीहरूलाई नियन्त्रणमा लिईएको प्रवक्ता बस्नेतले बताउनुभयो ।
पक्राउ परेका दुवैजनामाथि हातहतियार खरखजाना मुद्दा शिर्षकमा १० दिनको म्याद लिई थप अनुसन्धान कार्य भइरहेको धनुषा प्रहरीले जनाएको छ ।
तपाईको प्रतिक्रिया