लुम्बिनी । भारतीय प्रधानमन्त्री नरेन्द्र दामोदार दास मोदीले नेपाल भारतबीचको सम्बन्धन हिमालजस्तै अटल भएको बताएका छन् । बुद्धजयन्तीको अवसरमा लुम्बिनीमा आयोजित समारोहमा सोमबार सम्बोधन गर्दै प्रधानमन्त्री मोदीले दुई देशको सम्बन्धलाई हिमालजतिकै उचाइ दिनुपर्ने बताएका हुन् ।
‘भारत र नेपालबीचको सम्बन्ध हिमालजस्तै अटल छ, हिमालजस्तै पुरानो छ । त्यो नैसर्गिक र अस्वभाविक सम्बन्धलाई हिमालजतिकै उचाइ दिन जरुरी रहेको भारती प्रधानमन्त्री मोदीले भने ।
उनले नेपाल र भारतबीच भएको खानपान, रीतिरिवाज र पारिवारिक सम्बन्धनजस्तै इन्फास्टक्चर र प्रविधिमा पनि सहयोग गर्न भारत हरदम तयार रहेको बताए । नेपालीमै सम्बोधन गर्दै उनले भने, ‘नेपाल र भारतबीचको मित्रताले मानवीय संकल्पलाई पूरा गर्न दुवै देशले यसैगरी काम गरिरहन्छ भन्ने मैले विश्वास लिएको छु ।’
प्रधानमन्त्री मोदीले,‘नेपाल आउँदा राजनीतिक भ्रमणभन्दा छुट्टै अध्यात्मिक अनुभूति हुने समेत बताए । उनले यसको मूल कारण यहाँका प्राचीन सभ्यता, तीर्थस्थल, मठ–मन्दिर र सर्वोच्च शिखर सगरमाथा भएको बताए । उनले विगत सम्झिदैं भने , ‘ म जनकपुर आउँदा भनेको थिएँ– नेपाल बिना राम पनि अधुरो छन् । नेपाल र भारतबीच प्राचीनकालदेखि अद्भूत सम्बन्ध रहँदै आएको छ । त्यसलाई दुबै देश मिलेर समृद्धितर्फ अगाडि बढँउनुपर्छ । नेपाल र भारतको विरासतलाई मिलेर समृद्ध बनाउँ । बुद्ध सर्किट र लुम्बिनीलाई सहयोग गर्न भारत सधैं तयार छ ।’
यस्तै नेपाल र भारतका प्रधानमन्त्रीद्वय देउवा र मोदीको उपस्थितिमा दुई देशबीच विभिन्न पाँचवटा समझदारीपत्रमा हस्ताक्षर समेत भएको छ । प्रधानमन्त्री मोदीको लुम्बिनी भ्रमणका क्रममा शैक्षिक, साँस्कृतिक एवम् प्राविधिक विषयमा सहकार्य गर्नेसम्बन्धी बेग्लाबेग्लै समझदारीपत्रमा हस्ताक्षर भएको हो । नेपाल र भारतका प्रतिनिधि मण्डलबीच सो समझदारीपत्रमा हस्ताक्षर भएको हो ।
समझदारीपत्रको पूर्ण विवरण
१. लुम्बिनी बुद्धिष्ट विश्वविद्यालय र इन्डियन काउन्सिल फर कल्चरल रिलेसन (आइसिसिआर) बीच सम्झौता ।
२. सेन्टर फर नेपाल एण्ड एसियन स्टडिस (सिएनएस) र त्रिभुवन विश्वविद्यालयसँग इन्डियन काउसन्सिल फर कल्चरल रिलेसन (आइसिसिआर) बीच सम्झौता ।
३. काठमाडौं विश्वविद्यालय र इन्डियन काउन्सिल फर कल्चरल रिलेसन (आइसिसिआर) सँग सम्झौता ।
४. काठमाडौं विश्वविद्यालय र नेपाल एण्ड द इन्डियन इन्स्टिच्यूट अफ टेक्नोलोजी मदरासवीच सम्झौता ।
५. अरुण ४ निर्माण गर्न एसजेभीएन कम्पनीबीच सम्झौता ।
यसैबीच, भारत सरकारले निर्माण गर्ने इन्डिया इन्टरनेशनल सेन्टर फर बुद्धिष्ट कल्चर एण्ड हेरिटेज नेपालको नेपाल र भारतका प्रधानमन्त्रीद्वय देउवा र मोदीले संयुक्त रूपमा शिलान्यास समेत गरेका छन् ।
नेपालको एकदिने भ्रमणको क्रममा सोमबार बिहान लुम्बिनी आइपुगेका भारतका प्रधानमन्त्री मोदी अहिले लुम्बिनीमा आयोजित विभिन्न समारोहमा सरिक भएका छन् ।
तपाईको प्रतिक्रिया