जनकपुरधाम । वसन्तपुर दरबार स्क्वायरमा अक्सर मानिसहरूको बाक्लो चहलपहल हुने स्थानमा दुई दिनदेखि यहाँको एउटा कुनामा नयाँ पाल टाँगेर दुधे बालक लिएर कुमारी आमा अनशनमा बसेकी छिन् । ती दुधे बालक छेउमा राखेर लडिरहेका छन् भर्खरका दुई युवती ।
अनशनमा बसेकी ती कुमारी आमा हुन् निहारीका जो अविवाहित आमा बन्न बाध्य भइन् । दुई वर्षे दुधे बालकको साथमा न्याय माग्दै आज उनी काठमाडौं पुगेकी छिन् । त्यो बच्चाको बाबुले आफूलाई बलात्कार गरेको आरोप निहारिकाको छ ।
तर, जिल्ला धनुषाले आरोपीलाई सफाइ दिएपछि उनी आक्रोशित छिन् । उनी न्याय माग्दै निकै भौँतारिइन् । उच्च अदालतमा पुनरावेदन पनि गरिन् । तर, चार महिनासम्म मुद्दाको पेशी नै नतोकिएपछि निहारिका विक्षिप्त बनेकी छन् । र, संघर्षको सबैभन्दा कठोर रूप आमरण अनशन रोज्न पुगिन् ।
आमरण अनशनमा निहारिकालाई साथ दिइरहेकी युवती हुन् जश्मिन ओझा । निहारिकाकै उमेरकी हुन् उनी । कम उमेरमै उनले थुप्रै पीडित महिलाहरूलाई न्यायको ढोका ढकढकाउन सघाएकी छन् ।
अहिले उनी निहारिकाको लडाइँमा साथ दिन आफैँ आमरण अनशन बस्न तयार भइन् । न्यायको प्रत्याभूति नभएसम्म यो संघर्षबाट पछि नहट्ने बताउँछिन् जश्मिन ।
निहारिका र जश्मिनले गत शुक्रवारबाट माइतीघरको खाली सडकमा बसेर अनशन सुरु गरेका थिए । तर, राति प्रहरीले उनीहरूलाई त्यहाँबाट जबरजस्ती उठायो ।
निहारिकाको हातमा हतकडी नै लगाएर उनीहरूलाई सिंहदरबार वृत्तमा पु¥याइएको थियो । भोलिपल्टदेखि उनीहरू वसन्तपुरमा बस्न थालेका हुन् ।
दुवै युवती अहिले शारीरिक रुपमा गलेका छन् । तर, उनीहरूको अठोट गलेको छैन । बच्चाको डीएनए टेस्ट गर्नुपर्ने तथा मुद्दाको पेशी तोक्नुपर्ने मागबाट पछि नहट्ने मनस्थितिमा छन् उनीहरू ।
यी माग सामान्य हुन् । नियमित रुपमै हुनुपर्ने कुरा हुन् । तर, यति सामान्य विषयका लागि आमरण अनशन बस्नुपर्ने नियति निहारिकाले भोगेकी छन् । साभार नेपाल प्रेस
तपाईको प्रतिक्रिया