झापा, असार २८ । बुद्धशान्ति गाउँपालिका–४ स्थित मेची राजमार्गमा सोमबार पिकअप गाडीले ठक्कर दिँदा अटोरिक्सा चालकको मृत्यु भएको छ।
अटोचालक बुद्धशान्ति–७ का ४१ वर्षीय भानु खड्काको मृत्यु भएको छ भने अटोमा सवार दुई जना घाइते भएको जिल्ला प्रहरी कार्यालय झापाले जनाएको छ ।
बुद्धशान्ति–४ स्थित मेची राजमार्गमा उत्तरबाट दक्षिणतर्फ जाँदै गरेको को २ च २०६३ नम्बरको पिकअपले सोही दिशातर्फ जाँदै गरेको मे१ह ४६४४ नम्बरको अटोलाई ठक्कर दिएको हो।
घाइते अटोचालक खड्काको बीएण्डसी अस्पताल बिर्तामोडमा उपचारका क्रममा बेलुका साढे ४ बजे मृत्यु भएको हो। दुर्घटनामा घाइते भएका मेचीनगर–७ की १८ वर्षीया बिना सेञ्चुरी र मेचीनगर–४ की ३२ इन्दिरा राईको बिर्तामोडमा उपचार भइरहेको छ।
दुर्घटनामा संलग्न पिकअप चालक इलाम सूर्योदय नगरपालिका–१० का ५१ वर्षीय दिलीपकुमार प्रधानलाई नियन्त्रणमा लिएको प्रहरीले जनाएको छ।
तपाईको प्रतिक्रिया