जनकपुरधाम । धनुषामा ६ जनाले उम्मेदवारी फिर्ता लिएका छन् । बुधबार निर्वाचन कार्यालयमा लिखित रुपमा पत्र बुझाएर उनीहरुले उम्मेदवारी फिर्ता लिएका हुन् ।
निर्वाचन क्षेत्र १ को ‘ख’ मा नेपाली कांग्रेसबाट बागी उम्मेदवारी दिएका लक्ष्मीनारायण मण्डल केवटले फिर्ता लिएका छन् । उनले पाँच दलीय गठबन्धन अन्तर्गत लोकतान्त्रिक समाजवादी पार्टी (लोसपा)को भागमा परेको सीटमा बागी भएर उम्मेदवारी दिएका थिए । यहाँ पाँच दलीय गठबन्धनबाट प्रतिनिधिसभामा नेकपा माओवादी केन्द्रबाट मातृका प्रसाद यादव, प्रदेशसभाको ‘क’ मा नेपाली कांग्रेसका
संजय कुमार महतो र ‘ख’मा लोसपाका संजय कुमार सिंह उम्मेदवार छन् ।
एमाले र जसपाको गठबन्धनबाट जसपाका दीपक कार्की प्रतिनिधिसभाको साझा उम्मेदवार छन् । यस्तै, सोही क्षेत्रको प्रदेशसभा ‘ख’बाट पनि दुई जना स्वतन्त्र उम्मेदवारले उम्मेदवारी फिर्ता लिएका छन् । नेत्रदीप लामा र आनन्द मण्डलले स्वतन्त्र उम्मेदवारी दर्ता गराएका थिए । तर, बुधबार दुबै जनाले उम्मेदवारी फिर्ता लिएको निर्वाचन अधिकृत उत्तम खरेलले जानकारी दिए ।
निर्वाचन क्षेत्र ४ मा पनि तीन जनाले उम्मेदवारी फिर्ता लिएका छन् । यी क्षेत्रमा प्रतिनिधिसभाको लागि उम्मेदवारी दर्ता गराएका दुई जना र प्रदेशसभाको लागि ‘ख’ मा स्वतन्त्र उम्मेदवारी दर्ता गराएका एक जनाले उम्मेदवारी फिर्ता लिएका छन् । डा. सिके राउत नेतृत्वको जनमत पार्टीबाट प्रतिनिधिसभामा उम्मेदवारी दिएका किसुन यादव र नेपाल सद्भावना पार्टीबाट उम्मेदवारी दिएका राजेन्द्र महतोले उम्मेदवारी फिर्ता लिएको निर्वाचन अधिकृत सुदीप डङ्गोलले जानकारी दिए । उनका अनुसार अब यस क्षेत्रमा यी दुबै पार्टीका उम्मेदवार छैनन् । सोही क्षेत्रको प्रदेशसभा ‘ख’बाट स्वतन्त्र उम्मेदवारी दिएका रामदुलार महतोले पनि उम्मेदवारी फिर्ता लिएको उनले जनाए । यहाँ पाँच दलीय गठबन्धनबाट प्रतिनिधिसभामा कांग्रेसका महेन्द्र यादव, प्रदेशसभा ‘क’ मा शेषनारायण यादव र ‘ख’मा नेकपा (एकीकृत समाजवादी)का शत्रुधन महतो उम्मेदवार छन् । यहाँ नेकपा एमाले र जसपाबीच तालमेल हुन सकेको छैन ।
एमालेबाट रघुवीर महासेठ र जसपाबाट महाजन यादव प्रतिनिधिसभाका उम्मेदवार छन् । धनुषाको निर्वाचन क्षेत्र २ र ३ बाट कुनै पनि उम्मेदवारले उम्मेदवारी फिर्ता लिएका छैनन् । धनुषा ३ को ‘ ख’ मा कांग्रेस नेता हरिशंकर साहले बागी उम्मेदवारी दर्ता गराएका छन् । उनले उम्मेदवारी फिर्ता नलिने अडान लिएका छन् । यी सीट पाँच दलीय गठबन्धनले लोसपालाई दिएको छ । यहाँ लोसपाका परमेश्वर साह उम्मेदवार छन् । पाँच दलीय गठबन्धनबाट प्रतिनिधिसभामा लोसपाका अनिल झा, प्रदेशसभा ‘क’मा कांग्रेसका राम सरोज यादव र ‘ ख’मा लोसपाका परमेश्वर साह उम्मेदवार छन् । एमाले जसपा गठबन्धनबाट प्रतिनिधिसभामा जुली महतो, प्रदेश सभाको लागि ‘ क’मा एमालेका दीपेन्द्र ठाकुर र ‘ ख’मा जसपाका जितेन्द्र यादव उम्मेदवार छन् ।
तपाईको प्रतिक्रिया