भारतीय प्रम मोदीले घोषणा गरेको रकम अझै आएन

भारतीय प्रधानमन्त्री नरेन्द्र मोदीले चार वर्ष अघि जनकपुरधाम भ्रमणका क्रममा जनकपुर क्षेत्रको विकासका लागि गरेको २८ वैशाख ०७५ मा भारतीय प्रधानमन्त्री मोदी जनकपुर आउँदा जनकपुरको विकासका लागि १ अर्व भारतीय रकमको घोषणा गरेका थिए । तर, त्यसको ४ वर्षभन्दा बढी भइसक्दा पनि सो रकम आउने सकेको छैन । भारत सरकारले सहयोगमा दिने उक्त रकम कहिले आउने हो विषयमा नेपाल पक्ष अझै अनभिज्ञ नै छ ।

जनकपुरधाम उपमहानगरपालिका मेयर मनोज साहले भारतीय प्रधानामन्त्री नरेन्द्र मोदीले जनकपुरधामको विकासको लागि घोषणा गरेको रकम कहिले आउने विषयमा आफूलाई कुनै जानकारी नरहेको बताए । भारत सरकारले जनकपुरधामको विकासमा सहयोग गर्ने घोषणा गरेको थियो,मेयर साहले भने,‘ तर त्यसका लागि न नेपाल पक्षबाट राम्रो पहल भयो न त भारतीय पक्षबाटै चासो लिइयो । त्यसकारण अहिले अन्यौलको अवस्थामा छ ।’ भारत कुन काममा सहयोग गर्ने त्यसको विषयमा स्थानीय सरकार जनकपुरधाम उपमहानगरपालिका, मधेश प्रदेश सरकार र संघीय सरकारबीच न त छलफल भयो र न त कुनै सहकार्य नै भएको छैनन्,मेयर साहले भने,‘ यस्तो अवस्थामा भारत सरकारले पनि कहाँ कुन काम गरिदिने ? कुन कामको लागि पैसा दिने ? जस्ता प्रश्न उठछ । त्यसकारण यो नेपालतर्फको कमीकमजोरी हो ।

तर भारतीय पक्षले पनि चासो नलिनुले पनि यो काम अगाडि बढ्न सकेको छैन ।’ काठमाण्डुस्थित भारतीय दूतावासले उक्त रकमका लागि वृहत्तर जनकपुर क्षेत्र विकास परिषद्, मधेश प्रदेश सरकार र जनकपुरधाम उपमहानगरपालिकालाई योजनासहित प्रस्ताव पठाउन झण्डै दुई वर्ष अघि पत्राचार गरेको थियो । सोही अनुसार मधेश प्रदेशका भौतिक पूर्वाधार मन्त्रालयले दूतावासमा गुरुयोजनासहित प्रस्ताव पठाएको थियो ।तर, परिषद् र उपमहानगरपालिकासँग समन्वय नभएको बताउँदै दूतावासबाट प्रस्ताव फिर्ता आएको थियो । त्यसपछि वृहत्तर जनकपुर क्षेत्र विकास परिषदद्वारा प्रदेश सरकारसँग समन्वय गरेर एक अलग प्रस्ताव दूतावासमा पठाइएको थियो । उक्त प्रस्तावमा परिक्रमा अन्तर्गत नेपालभित्रका १० वटा विश्रामस्थल र जनकपुरको रंगभूमि मैदानलाई सौन्र्दयकरण सहितका कार्यहरु समावेश गरिएको थियो । पछि त्यो प्रस्ताव पनि पास भएन । ४ महिना अघि वृहत्तरले जनकपुरधाम स्थित गोपाल धर्मशालाको तीन विघा जग्गामा आधुनिक धर्मशाला निर्माण, भ्यू टावर, व्यवसायिक प्रतिष्ठानका लागि सटरहरु निर्माण गर्ने लगायतका प्रस्ताव तयार गरी पठाएको थियो ।

केही दिन अघि मात्रै जिम्मेवारी बाट अवकास पाएका वृहतर जनकपुरका निर्देशक बलराम ठाकुरले भने,’ पछिल्लो पटक पठाएको प्रस्तावमा भारतीय पक्ष सहमत छ । तर गोपाल धर्मशालाको जग्गा गुठी संस्थान मातहतको रहेकोले जग्गा अधिग्रहण प्रक्रिया पूरा भएपछि मात्रै त्यो अगाडि बढ्ने कुरा भएको छ । तर अहिलेसम्म जग्गा अधिग्रहण नै नभएकोले त्यो कार्य रोकिएको हो ।‘