सिरहा जिल्लाको गोलबजारको व्यवसायिक कारोबार बुधवार व्यापारीहरुले बन्द गरेका छन् ।
गोलबजार नगरपालिकाको वडा नम्बर –४ मा हार्डवेयरको व्यवसाय गर्ने एकजना व्यवसायीले ऋणभारको दबाब खप्न नसकी आत्महत्या गरेको बताइएको छ । सिरहा लहानपछिको ठूलो बजार मानिने गोलबजारका युवा व्यवसायी पप्पु महासेठले बैंकको ऋणको ताकेतालाई सहन गर्न नसकी आत्महत्या गरेको स्थानीय व्यवसायीहरुले जनाएका छन् । गोलबजार नपा–४ मा रहेको राजदेवी इन्टरप्राइजेजका संचालक पप्पु महासेठले ऋणभारको बढदो चाप र बैंकहरुको कडा ताकेताको कारण आत्महत्या गरेको उद्योग व्यापार संघ गोलबजारका महासचिव राकेश गुप्ताले जनाए । ‘क्षमतावान युवा व्यवसायी महासेठ सामान्य कारणबाट आत्महत्या गर्न सक्ने थिएनन्’ गुप्ताले भने, उनको निधनबाट सम्पूर्ण व्यवसायीहरु स्तब्ध छन् ।टायल्स , मार्वल लगायत हार्डवेयरका व्यवसायी महासेठले पूर्व मन्त्री समेत रहेका नवनिर्वाचित प्रदेश सभासदस्य अनिरुद्ध सिंह कोइरीको निवाससँगै रहेको गोदाम घरमा झुण्डिएर आत्महत्या गरेको प्रहरीले जनाएको छ । महासेठको असामायिक निधनले गोलबजारका सम्पूर्ण व्यापारी आज दिनभरि आ–आफ्नो पसल बन्द गरेर शोक मनाउने बताएका छन। उनले भने, बैंकको ब्याजदर दोब्बर भएको हुनाले बैंकको प्रेसर र व्यक्तिगत प्रेसर झेल्न नसकेको कारण महासेठले आत्महत्या गरेको गुप्ताले बताएका छन ।
‘बैंकको बढदो ब्याजदर सहितको ऋणभारलाई उद्योगी व्यवसायीहरुले धान्न सक्ने अवस्था छैन्’ गुप्ताले भने, बैंकहरुलाई ब्याज घटाउन देशैभरिका उद्योगी व्यवसायीहरुले विरोधगर्दै सडकमा उत्रेका थिए ।तर बैंक सञ्चालक र सरकारले त्यसलाई गंभीरतापूर्वक नलिएको आरोप गुप्ताले लगाए ।व्यवसायप्रति पूर्णरुपमा समर्पित महासेठको कारोबारमा केही महिनादेखि कमी आएको स्थानीयहरुको कथन छ । बैंकहरुले निरन्तर बढाइरहेको ब्याजदर, व्यवसायमा मन्दी, उधारो असुलीमा समस्या लगायतले उद्योगी व्यवसायीहरु भारी दबाबमा रहेका छन् ।व्यवसायमा पुँजी लगाउनु पर्ने तर बैंकले ब्याज र किस्ता बुझाउन पसलमै गएर दबाब दिने गरेका छन् । ‘मध्यमवर्गीय प्रतिष्ठित व्यवसायीहरुका लागि बैंकको ऋण, ब्याज सर्वाधिक तनावको कारण बनेको छ ’गुप्ताले भने, सरकार र बैंक सञ्चालकहरुले समयमै ध्यान नदिए उद्य्रोग, व्यवसायको क्षेत्रमा गंभीर समस्या आउन सक्छ । आत्महत्या भएको घटनास्थलमा कुनै ‘सुसाइड नोट’ फेला नपरेको गोलबजार इलाका प्रहरी कार्यालयका प्रहरी नायव उपरिक्षक (डीएसपी )राजु केसीले बताए । ‘महासेठले आत्महत्या नै गरेको प्रारम्भिक अनुसन्धानबाट देखिएको छ’ डीएसपी केसीले भने, पोष्टमार्टमको रिर्पोट आएपछि विभिन्न कोणहरुबाट अनुसन्धान थालिने छ ।
आत्महत्याको कारणबारे अहिले नै यकिन गर्न नसकिने डीएसपी केसीले बताए । १० वर्षदेखि व्यवसायमा लागेका महासेठको ५ वर्षीया एकजना छोरी र ३ वर्षीय एकजना छोरा रहेका छन् । उनले ७ वर्ष अगाडि विवाह गरेका थिए । स्थानीय बासिन्दाहरुका अनुसार महासेठको मृत्युको कारण ‘प्रेम’पनि हुन सक्छ । युवतीसितको प्रेमको कारण महासेठको परिवारमा केही दिनदेखि तनाव रहेको समेत बताइएको छ ।प्रहरीले यस कोणबाट पनि अनुसन्धान थालिएको जनाएको छ ।यद्यपि महासेठकी प्रेमिका भनिएकी महिलाको बारेमा कुनै खुलासा हुन सकेको छैन् ।आधिकारिक रुपमा उनको परिवार अथवा प्रहरीले आत्महत्याको कारण महिला भएको पुष्टि गरेको छैन् ।महासेठको कल डिटेल र उनको पछिल्ला दिनहरुमा हुने भेंटघाटको क्रमलाई समेत अनुसन्धानको पाटो बनाइएको डीएसपी केसीले जनाए ।
बैंकको ऋणभारको विषयमा व्यवसायीहरुले जनाए पनि प्रेमप्रसंगको विषयमा उनीहरुले अनभिज्ञता प्रकट गरेका छन् ।प्रहरीका अनुसार घटनामा महिलाको संलग्नता देखिए कारबाहीको दायरामा ल्याइनेछ ।
तपाईको प्रतिक्रिया