जनकपुरधाम, फागुन ६ गते । आज महाशिवरात्रि हिन्दु धर्मावलम्बीहरूले भगवान शिवको पूजा आराधना गरी महाशिवरात्रि पर्व मनाउँदै छन् । हरेक वर्ष फागुन कृष्ण चतुर्दशीका दिन यो पर्व मनाइन्छ ।
महाशिवरात्रिको अवसरमा आज बिहानैदेखि जनकपुरधाम लगायत यस आसपासका शिवालयहरूमा भक्तजनको घुइँचो लागेको छ ।
जनकपुरधामको शिवचोकस्थित शिव मन्दिर, कपिलेश्वर नाथ, कुपेश्वर नाथ, क्षिरेश्वरनाथ लगायत जलेश्वरस्थित जलेश्वरनाथ मन्दिरमा पनि बिहानैदेखी भक्तजनहरुको भीड लागेको छ ।
जटाधारी, निलकण्ठ, भोले बाबा, देवादी देव महादेव, शंकर, कैलाशपतिलगायत विभिन्न नामले पुकारिने शिवको प्यारो दिन भनेर महाशिवरात्रीलाई मानिन्छ ।
पार्वतीसँग विवाह भएको दिनका रूपमा पनि लिइने यस दिनलाई शिवभक्तले विशेष महत्वको रूपमा मनाउने गरेका छन् ।
महाशिवरात्रिको अवसरमा जनकपुरधामका बिभिन्न युवा क्लबहरूले भक्तजनको सुविधालाई ध्यानमा राख्दै शिव मन्दिरहरूमा राम्रो व्यवस्थापन गरेका छन् ।
तपाईको प्रतिक्रिया