जनकपुरधाम, चैत १५ गते । मधेश प्रदेशका मुख्यमन्त्री सरोजकुमार यादवले मिटरब्याज पीडितहरुको समस्याप्रति प्रदेश सरकार गम्भीर रहेको बताएका छन् ।
मुख्यमन्त्री यादवले पैदल हिडेर काठमाण्डौ पुगेका र काठमाण्डौ पुग्न नसकी घरमै उकुसमुकुसमा परेका मिटरब्याज पीडितहरुको समस्याप्रति सरकार गम्भीर रहेको बताएका हुन् ।
मिटरब्याज पीडितहरुलाई ईंगित गर्दै मुख्यमन्त्री यादवले भनेका छन्, ‘तपाईंको आंसुको हरेक थोपामा हाम्रो साथ छ । मधेसबाट उठेपनि यो समस्या देशकै हो । एकातिर बैंकले ऋण नदिने, अनेक अड्चन खडा गर्ने, दिएपनि चर्को ब्याज लगाउने अर्कोतिर मजबुरीको फाइदा उठाई गाउँघरका कतिपय साहुकारहरुमा अत्याचार नै गर्ने द्रव्य पिचाशी प्रवृति देखिएको छ । शोषणविरुद्ध केन्द्र, राष्ट्र बैंक तथा प्रदेश समेतले मिलेर संयुक्तरुपमा काम गर्न, विशेष अधिकार सम्पन्न शक्तिशाली आयोग खडा गर्न जरुरी रहेको छ । जनताले न्याय मागिरहेका छन्, न्याय पाउनुपर्दछ । बैंकले बाटो खोल्नुपर्छ । आम जनतामा सहज र सुलभ रुपमा ऋण प्रवाह हुनुपर्दछ ।’
मुख्यमन्त्री यादवले केन्द्र सरकारले मिटरब्याजलाई अपराध घोषणा गरी कानुनी दायरामा ल्याउन गरेको पहलको स्वागत गर्दै भनेका छन्, ‘तथापि यसले समग्र समस्यालाई कति सम्बोधन गर्नेछ, गम्भीर भएर सोच्न जरुरी छ । विदेश जान वा अध्ययन गर्न वा अन्य भैपरि गर्जो टार्न ऋण खोज्ने नागरिकहरुलाई मिटरब्याजीहरुबाट बचाउँदै के कसरी सहयोग र सहकार्य गर्न सकिन्छ यसबारे ठोस गृहकार्य गरी ठोस नीति बनाउन जरुरी छ ।’
गरिब झन गरिब हुने, भएको सम्पत्तिसमेत स्वाहा हुने राष्ट्रिय समृद्धिका बाधक यस समस्याविरुद्ध संयुक्त रुपमा लड्न प्रदेश सरकारको तर्फबाट विद्वत वर्ग, चिन्तक, योजना विद्, विज्ञहरुलाईसमेत उनले आह्वान गरेका छन् ।
तपाईको प्रतिक्रिया