काठमाडौं, वैशाख ३ गते । पाचौँ पटकको प्रयासपछि अमृत साइन्स (अस्कल) क्याम्पसमा स्ववियु निर्वाचन सम्पन्न भएको छ । १ हजार ८२६ विद्यार्थी मतदान रहेको अस्कलमा १ हजार ३७४ जनाले मतदान गरेका छन् ।
पाचौँ पटकको प्रयासमा आज शान्तिपूर्ण वातावरणमा मतदान सम्पन्न भएको हो । तीन पटक स्थगित हुँदै पाचौँ प्रयासमा भने निर्वाचन सम्पन्न भएको हो । विद्युतीय भोटिङ मेसिनबाट मतदान भएको हो ।
स्वयिवु अध्यक्ष पदका लागि चार जना उम्मेदवार छन् । अनेरास्ववियुबाट कमल जोशी प्यानलसहित उम्मेदवार बनेका छन् । त्यस्तै संयुक्त प्यानलबाट अखिल क्रान्तिकारीबाट प्रेम जैसी (मामा प्रेम) उम्मेदवार बनेका छन् । उनलाई नेविसंघ र नेपाल प्रजातान्त्रिक विद्यार्थी संगठनको समर्थन छ । त्यस्तै नेपाल क्रान्तिकारी विद्यार्थी संघबाट मनिष गोरा र स्वतन्त्रबाट लक्ष्मण सिंह धामी (एलएस) उम्मेदवार छन् ।
चैत ५ गते अखिल क्रान्तिकारी लगायतका विद्यार्थी संगठनको तालाबन्दीका कारण निर्वाचन हुन सकेको थिएन ।
त्यसपछि चैत १८ गतेका लागि निर्वाचन मिति तोकिएको थियो । त्यो मितिमा पनि निर्वाचन हुन सकेन । त्यसपछि २४ चैतमा स्ववियु निर्वाचनको मिति तोकियो । चैत २४ गतेको निर्वाचन अन्तिम समयमा आएर स्थगित भएको थियो । त्यसपछि चैत ३० गतेका लागि निर्वाचन हुने भनेर नयाँ कार्य तालिका समेत सार्वजनिक गरियो । तर, अन्तिममा आएर उक्त मितिमा समेत निर्वाचन हुन सकेन ।
चैत ३० गते बिहान ८ बजेदेखि बेलुका ५ः३० बजेसम्मका लागि मतदानको समय समेत तोकिएको थियो । तर, त्यो दिन परीक्षा भएको तथा आवश्यक प्राविधिक तयारी नपुगेको भन्दै वैशाख ३ गतेका लागि सारिएको थियो ।
निर्वाचन गराउन नसकेको भन्दै अनेरास्ववियुले उच्च अदालत पाटनमा मुद्दा हालेको थियो । त्यसपछि अदालतले तत्काल निर्वाचन गराउन अन्तरिम आदेश जारी गरेको थियो ।
तपाईको प्रतिक्रिया