धनुषा निर्वाचन क्षेत्र नम्बर–३ का राष्ट्रिय स्वतन्त्र पार्टी (रास्वपा) का उम्मेदवार मनिष झाले जनकपुरधाम उपमहानगरपालिका वडा नं. २ र ५ मा घरदैलो तथा भेटघाट कार्यक्रम सम्पन्न गरेका छन् । स्थानीय टोल–टोलमा पुगेर उनले नागरिकका गुनासा, समस्या र आवश्यकताबारे प्रत्यक्ष रूपमा जानकारी लिएका छन् ।
घरदैलोका क्रममा स्थानीय बासिन्दाले खानेपानी, ढल व्यवस्थापन, सडक स्तरोन्नति, बेरोजगारी तथा युवापलायनजस्ता विषय उठाएका थिए । ती समस्यालाई गम्भीरतापूर्वक लिएको उल्लेख गर्दै झाले समाधानका लागि आफू प्रतिबद्ध रहेको बताएका छन् ।
उनले जनकपुरधामभित्रै आधारभूत सेवामा असमानता अझै कायम रहेको टिप्पणी गर्दै जनताको करबाट सञ्चालित निकायले पारदर्शिता र जवाफदेहिता देखाउनुपर्ने धारणा राखे । उनका अनुसार सुशासन, पारदर्शिता र परिणाममुखी कार्यशैलीलाई प्राथमिकतामा राखेर अघि बढ्ने योजना रहेको छ ।
युवालाई लक्षित गर्दै उनले स्वदेशमै रोजगारी तथा अवसर सिर्जना गर्ने वातावरण निर्माण गर्न पहल गर्ने प्रतिबद्धता जनाए ।
झाले शिक्षा र स्वास्थ्य क्षेत्रलाई समेत आफ्नो मुख्य एजेन्डामा राखेको बताए । सामुदायिक विद्यालयको गुणस्तर सुधार, सीपमूलक तालिमको विस्तार तथा स्वास्थ्य सेवामा सहज पहुँच सुनिश्चित गर्न संसद्मा सशक्त आवाज उठाउने उनको भनाइ थियो ।
कार्यक्रमका क्रममा केही बासिन्दाले विगतमा निर्वाचित जनप्रतिनिधिले गरेका प्रतिबद्धता पूरा नभएको गुनासो गरेका थिए । त्यसप्रति प्रतिक्रिया दिँदै झाले अब जनताले भाषणभन्दा कामको परिणाम हेर्न चाहेको उल्लेख गर्दै आफू वाचाभन्दा बढी काम गरेर देखाउने प्रतिबद्धताका साथ अघि बढेको बताएका छन् ।
तपाईको प्रतिक्रिया