परिवर्तनमुखी परिणामको दाबी गर्दै मनिष झा गाउँ–टोलमा

धनुषा निर्वाचन क्षेत्र नम्बर–३ मा प्रतिनिधिसभा सदस्यका लागि उम्मेदवारी दिएका राष्ट्रिय स्वतन्त्र पार्टी (रास्वपा)का मनिष झाले आफ्नो चुनावी घरदैलो अभियानलाई तीव्र बनाएका छन्। आधारभूत सेवा सुधार, सुशासन प्रवद्र्धन र युवा रोजगारी सिर्जनालाई मुख्य एजेन्डा बनाएर उनी यतिबेला गाउँ–टोलमा प्रत्यक्ष भेटघाटमा सक्रिय देखिएका छन् ।

शनिबार उनले नगराइन नगरपालिका–२ जटही तथा जनकपुरधाम उपमहानगरपालिका–६ मा घरदैलो कार्यक्रम सम्पन्न गर्दै स्थानीय नागरिकसँग प्रत्यक्ष संवाद गरे। टोल–टोलमा पुगेर जनगुनासा सुन्दै उनले खानेपानी, ढल व्यवस्थापन, सडक स्तरोन्नति, बेरोजगारी र युवापलायनजस्ता समस्याप्रति आफू गम्भीर रहेको बताए ।

विश्व तीव्र गतिमा विकासतर्फ अघि बढिरहेको अवस्थामा पनि धनुषा–३ का बासिन्दाले आधारभूत सेवामा असमानता भोग्नु दुःखद भएको उनको भनाइ छ । ‘जनताको करबाट सञ्चालन हुने निकायले पारदर्शिता र जवाफदेहिता देखाउनुपर्छ,’ उनले भने, “रास्वपाको नेतृत्वमा सरकार बने सुशासन, पारदर्शिता र परिणाममुखी काम गरेर देखाउनेछौं ।”

विशेषगरी युवालाई स्वदेशमै रोजगारीको अवसर उपलब्ध गराउने वातावरण निर्माण गर्ने आफ्नो प्राथमिकता रहेको उनले बताए । शिक्षा र स्वास्थ्य क्षेत्रको सुधारलाई समेत मुख्य प्राथमिकतामा राखेर काम गर्ने प्रतिबद्धता उनले व्यक्त गरे । विगतमा निर्वाचित प्रतिनिधिहरूले गरेका प्रतिबद्धता पूरा हुन नसक्दा नागरिकमा निराशा बढेको उल्लेख गर्दै यसपटक मतदाता सचेत भएकाले परिणाम परिवर्तनमुखी हुने विश्वास उनले व्यक्त गरे ।

झाले जातीयता वा पारिवारिक स्वार्थभन्दा माथि उठेर देशको समृद्धि, सार्वजनिक सेवामा सुधार र सुशासनलाई केन्द्रमा राखेर राजनीति अघि बढाउनुपर्नेमा जोड दिए । घरदैलोका क्रममा स्थानीय बासिन्दाले न्यानो स्वागत गर्दै विकास, पारदर्शिता र प्रभावकारी सेवा प्रवाहप्रति आफ्नो अपेक्षा व्यक्त गरेका छन् ।