काठमाडौं : तेस्रो संस्करणको मिस्टर एण्ड मिस थारु २०२१ को अडिसन यही माघ २४ गते (भोलि)देखि शुरु हुने भएको छ ।
वाइएसी इभेन्ट्सको सहकार्यमा जह इन्टरटेनमेन्टद्वारा आयोजित प्रतियोगिताको देशका विभिन्न शहरहरुमा एकै साथ अडिसन हुने भएको छ । आयोजकले काठमाडौंमा पत्रकार सम्मेलन गरी अडिसनको सबै तयारी पुरा भइसकेको जानकारी दिएको हो ।
जह इन्टरटेनमेन्टका प्रवन्ध निर्देशक सुरेश चौधरीले अडिसनको सम्पूर्ण तयारी पुरा भइसकेको भन्दै भने,‘अडिसनस्थलदेखि सहभागिहरुको तयारी पुरा भइसकेको छ, फागुन पहिलो सातासम्म अडिसनका सबै काम सकिन्छ ।’ अडिसनको पहिलो दिन माघ २४ गते चितवनको भरतपुरस्थित लाइम एण्ड लेमन लङज, विराटनगरको इनर्जी वल्र्ड जिम एण्ड फिटनेस सेन्टर र नेपालगञ्जको स्वस्तिक कटेज एण्ड गार्डेन रिसोर्टमा अडिसन हुनेछ ।
यस्तै माघ २८ गते सुनसरीको झुम्कास्थित सोउल म्युजिक प्रोडक्सन, सिराहाको लहानस्थित अर्किड क्याफे, पर्साको वीरगञ्जस्थित होटल ओम रेसिडेन्सी रेष्टुरेन्ट एण्ड बार र कैलालीको धनगढीस्थित थारु छात्रवासमा अडिसन हुने आयोजकले जनाएको छ । फागुन १ गते काठमाडौंको अनामनगरस्थित युनियन हाउस, रुपन्देहीको बुटवलस्थित होटल द बुटवल भ्यू र दाङको घोराहीस्थित कविला रिसोर्टमा अडिसन हुने प्रवन्ध निर्देशक चौधरीले बताए ।
अडिसनपछि छनोट भएका प्रतिस्पर्धीहरुको काठमाडौंमा प्रशिक्षण गरिने छ । उनीहरुलाई २५ दिनसम्म विभिन्न विधामा रहेर प्रशिक्षण दिने इभेन्ट डाइरेक्टर रुपेश चौधरीले जानकारी दिए । प्रतियोगिताको फाइनल चितवनको सौराहामा चैत ७ गते हुनेछ । प्रतियोगिताको विजेताले नगद ५० हजार, फस्ट रनरअपले ३० हजार, सेकेण्ड रनरअपले २० हजार र विभिन्न उपहारहरु प्राप्त गर्ने इभेन्ट म्यानेजर सुदिप चौधरीले जानकारी दिए ।
पहिलो र दोस्रो संस्करणको सफलतापछि आयोजकले कोभिडका कारण ढिला गरी प्रतियोगिता आयोजना गर्न लागेको हो । पत्रकार सम्मेलनमा बोल्दै इभेन्ट मेन्टर निश्मा चौधरीले यस प्रतियोगिताले युवायुवतीहरुलाई व्यक्तित्व विकासमा टेवा पुर्याउनुको साथै कला संस्कृतिको संरक्षण र प्रवद्र्धनमा महत्वपूर्ण योगदान दिने बताइन् ।
उनले मिस्टर एण्ड मिस थारु सिजन १ र २ मा कोरियोग्राफीको भूमिका निर्वाह गरेकी थिइन् । सम्मेलनमा बोल्दै सिजन २ की फस्ट रनरअप सुनेश्वरी कुमारी दासले यस प्रतियोगिताले आफ्नो व्यक्तित्वको विकासको साथै समाजप्रति थप जिम्मेवार बन्न प्रेरित गरेको बताइन् । उनले प्रतियोगिता पश्चात पनि सहभागिहरुले विभिन्न अवसरहरु पाउने भएकाले यस सिजनमा सहभागि हुन युवायुवतीहरुलाई आग्रह गरेकी छिन् ।
तपाईको प्रतिक्रिया