काठमाडौ : नेपालमा कोरोना भाइरवरूद्धको पहिलो डोजको खोप अभियान आज सकिँदै छ ।
स्वास्थ्यकर्मी, सफाइकर्मी, एम्बुलेन्स चालकसहित अग्रपंक्तिमा कार्यरत ४ लाख ३० हजार जनालाई लक्षित गरि माघ १४ बाट नेपालमा कोरोना खोप अभियान सुरू भएको थियो ।
आज शुक्रबारसम्म १ लाख ७१ हजार ४ सय ८६ जनाले पहिलो डोजको खोप लगाएका छन् । स्वास्थ्य मन्त्रालयका अनुसार शुक्रबारसम्म प्रदेश १ मा २३ हजार ८२, प्रदेश २ मा २२ हजार ७ सय ५६, बागमतीमा ५९ हजार ९ सय ४२, गण्डकीमा १७ हजार ३ सय १५, लुम्बिनीमा २६ हजार ८ सय ९८, कर्णालीमा ८ हजार ६ सय ८४ र सुदूरपश्चिम प्रदेशमा १२ हजार ८ सय ९ जनाले खोप लगाएका छन् ।
दैनिक खोप लगाउनेको औषत संख्यालाई आधार मान्दा शनिबारसम्म खोप लगाउनेको संख्या २ लाख पनि पुगेन । सरकारले ३ सयभन्दा बढी खोप केन्द्रबाट खोप लगाउने घोषणा गरे पनि शुक्रबारसम्म २०१ केन्द्रबाट मात्र खोप उपलब्ध गराएको थियो ।
खोप लगाउन गरिएको आह्वान लक्षित वर्गसम्म नपुग्नु, सदरमुकाम केन्द्रित खोप केन्द्रमा सबैको पहुँच नहुँनु तथा खोप लगाउन अनिवार्य नगरिएकाले पनि पहिलो डोजको खोप लगाउन मानिसहरूको सहभागिता कम भएको हुन सक्ने सरकारी अधिकारीहरूको भनाइ छ । ‘खोप खेर नजाओस् भनेर हामीले ७७ वटै जिल्लामा सदरमुकाम केन्द्रित खोप केन्द्र सञ्चालन गर्यौँ यसले मानिसहरूमा पहुँच नपुगेको हुन सक्छ, खोप केन्द्र थप विस्तार गर्दैछौँ अरू चरणमा पक्कै पनि सहभागिता बढ्छ,’ स्वास्थ्य सेवा विभागको खोप शाखा प्रमुख एवं खोप विज्ञ डा.झलक शर्मा गौतमले भने ।
भारतले नेपाललाई १० लाख डोज ‘कोभिशिल्ड’ खोप अनुदानमा उपलब्ध गराएपछि लगाउन थालिएको थियो । पहिलो डोज खोप लगाएकाहरूलाई २८ दिनपछि दोस्रो डोज दिइनेछ । ‘कोभिशिल्ड’को दोस्रो डोज अहिले प्राप्त अनुदानकै खोपबाट पुग्नेछ । यसबाट उग्रिएको खोप नयाँ समूहलाई दिइने छ । खेर जाने दर १ प्रतिशतभन्दा पनि कम भएकाले साढे ४ लाख जनालाई अहिले उपलब्ध भएकै खोप पुग्ने गौतमले बताए ।
दोस्रो चरणको रणनीति : पहिलो चरणको पहिलो डोज लगाउनेहरूकै संख्या कम देखिएपछि खोप लगाउनेको जनसहभागिता बढाउने गरि रणनीतिमा सरकार अघि बढेको छ । दोस्रो चरणको खोप अभियानमा सहभागिता पनि बढ्ने गरी सूचना सम्प्रेषण बढाउने, मानिसहरूमा भएको अन्यौलता हटाउने तथा खोप केन्द्रहरू बढाउने गरि छलफल अघि बढेको डा.गौतमले बताए ।
दोस्रो चरणको खोप लगाउनेहरूको प्रारम्भिक सूचीसमेत तय भइसकेको छ । स्वास्थ्य मन्त्रालयका अनुसार दोस्रो चरणमा जोखिमका आधारमा विभिन्न पेशामा आवद्धहरूलाई खोप लगाइने छ । कोभ्याक्स सुविधा अन्तर्गत नेपालले २२ लाख ५६ हजार खोप पाउने छ । कोभ्याक्सले खोप वितरणको सुरुवात फेब्रुअरी अन्तिम अर्थात फागुन पहिलो साताबाट सुरु गर्ने जनाएको छ । कोभ्याक्सले बुधबार ‘अन्तरिम वितरण पूर्बानुमान’ शीर्षक राखेर जारी गरेको वक्तब्यमा १४० राष्ट्रलाई पहिलो चरण अन्तर्गत ३३ करोड ६० लाख खोप वितरण गर्ने जनाएको छ ।
उक्त वितरण ब्यवस्था बमोजिम नेपालले उक्त मात्रामा खोप पाउने भएको हो । नेपालले पाउने खोप बेलायतको अक्सफोर्ड विश्वविद्यालय र आष्ट्राजेनिकाले संयुक्त रुपमा विकास गरेको हुनेछ । खोपमा सबै राष्ट्रको पहुँचका लागि कोभ्याक्सले करिब २४ करोड खोप आष्ट्राजेनिका र अक्सफोर्ड विश्वविद्यालयले उत्पादन गर्ने खोप खरिद गर्ने सम्झौता गरेको छ ।
प्रकाशित :माघ २४, २०७७
तपाईको प्रतिक्रिया