म्याग्दी, १४ फागुन । म्याग्दीको बेनी नगरपालिका-४ फापरखेतमा जिप दुर्घटना हुदा एक जनाको मृत्यु भएको छ।
मालिका गाउँपालिका–३ पात्लेबाट बिरामी लिएर बेनीतर्फ आउँदै गरेको ग१ज ६७८८ नम्बरको जिप गएराति सडकबाट म्याग्दी नदीमा खसेर दुर्घटना भएको हो।
दुर्घटनामा परेर मालिका–३ का ६२ वर्षीय गोविन्द रोकाको मृत्यु भएको जिल्ला प्रहरी कार्यालय म्याग्दीले जनाएको छ । दुर्घटनामा गम्भीर घाइते भएको रोकाको बेनी अस्पतालमा उपचारका क्रममा ज्यान गएको हो।
प्रहरीका अनुसार रुखबाट लडेर घाइते भएका मालिका–१ निस्कोटका ३० वर्षीय नरबहादुर रोकालाई थप उपचारका लागि पोखरा लैजाँदै गरेको जिप दुर्घटना भएको हो।
जिप दुर्घटनामा परेर घाइते भएका मालिका–३ पात्लेका २९ वर्षीय रवीन्द्र रोका, २० वर्षीया रेजिना रोका र ३८ वर्षीय खगेन्द्र रोकाको बेनी अस्पतालमा उपचार भइरहेको प्रहरीले जनाएको छ। चालक बाहेक अरू सबै एकै परिवारका सदस्य रहेको प्रहरीले जनाएको छ। दुर्घटनाबारे थप अनुसन्धान थालिएको प्रहरीले जनाएको छ।
तपाईको प्रतिक्रिया