सर्लाही, १ असार । सर्लाहीको उत्तरी क्षेत्रका अधिकांश सडक बर्खा लागेसँगै अवरुद्ध भएका छन्। पानी पर्ने क्रम बढेसँगै खोलाको बगर र चुरे पाखाका गोरेटो बाटाहरू अवरुद्ध भएका हुन्।
सडक नपुगेको चुरे भेगका नागरिक हरेक सालको बर्खायामका केही महिना कष्टपूर्ण दिनचर्या बिताउन बाध्य हुँदै आएका छन्। पूर्वपश्चिम राजमार्गमा पर्ने बागमती, हरिवन लालबन्दी र ईश्वरपुर नगरपालिकाका उत्तरी चुरेमा पर्ने बस्तीहरूमा सडक अवरुद्ध हुँदा आवतजावत गर्न समस्या हुने लालबन्दी नगरपालिका वडा नम्बर १२ का वडाध्यक्ष दुर्गाबहादुर आले बताउँछन्।
ईश्वरपुर नगरपालिकाको वडा नम्बर १२, मा पर्ने पिपलदमार, गुइडुङ, छोड्के, लामिदमार, अड्डी, लालबन्दी नगरपालिकाको वडा नम्बर १५ को शिर कालिन्जोर, तीनतले, भित्रीखोला, लालबन्दीकै वडा नम्बर १४ नारायणखोला, वडा नम्बर १२ र १३ का चुरे बस्ती, हरिवन नगरपालिकाको वडा नम्बर १ र ८ का चुरे बस्ती तथा बाग्मती नगरपालिकाको १ र १२ मा पर्ने चुरे क्षेत्रका बस्तीमा जाने सडक पानीले बिगारेको स्थानीय बासिन्दाले बताएका छन्।
खोलाको बगर एवं चुरे पहाडका गोरेटो बाटो ठाउँ–ठाउँमा बिग्रिँदा पानी पँधेरो गर्नदेखि बिरामी परेर औषधोपचारका लागि अस्पतालसम्म जान समस्या हुन थालेको हरिऔन नगरपालिका–१ धमिलेका स्थानीय सन्त राइले गुनासो गरे।
खोलामा बाढी आउँदा चुरेका बासिन्दालाई बर्खायाममा एकबाट अर्को बस्तीसम्म जान मुस्किल पर्छ। हिउँद लागेपछि भने चुरेका गोरेटो बाटो केही स्थानीय तह र गाउँले आफै र खोलाको बगरको बाटो यातायात व्यवसायी मिलेर मर्मत गरी हिँड्डुल गर्न मिल्ने र हल्का सवारी साधन चल्न सक्ने बनाउने गरेका छन्।
जेठ महिनाको अन्तिमसाता यता निरन्तर वर्षा भइरहेकोले खोलाको आसपास र तटीय क्षेत्रमा बसोबास गर्ने स्थानीय बस्तीमा बाढी पस्ने डरले त्रसित भएका छन्। अघिल्लो वर्षको बर्खामा बागमती, लखन्देही, फूलजोर खोलाको बाढीले सयौं बिगाहा खेतीयोग्य जमिन कटान गरेको थियो। वर्षायाममा बाढीका कारण आइपर्ने विपद् व्यवस्थापनमा कुनै पनि स्थानीय तहले प्रयाससमेत नगरेको स्थानीयको गुनासो छ।
तपाईको प्रतिक्रिया