विराटनगर, २१ माघ । विराटनगर विमानस्थल विस्तार गर्दा विस्थापित हुने जग्गाधनीहरूले संस्कृति पर्यटन तथा नागरिक उड्ययन मन्त्री भानुभक्त ढकाललाई ज्ञापनपत्र बुझाएका छन्।
उचित मुआब्जा र क्षतिपूर्ति माग गर्दै संघर्ष समितिका संयोजक वेदराज पौडेल लगायतको टोलीले मन्त्री ढकाललाई विराटनगर विमानस्थलमा भेटी ८ बूँदे ज्ञापनपत्र बुझाएको हो।
मन्त्री ढकालले जिल्लास्तरमै प्रमुख जिल्ला अधिकारीको संयोजकत्वमा बन्ने मुआब्जा निर्धारण तथा वितरण समितिलाई पीडितहरूको मागको उचित सम्बोधनका लागि आफूले निर्देशन दिने बताए। ‘यहीँबाट तपाईंहरुको माग सम्बोधन हुन्छ, उनले भने, माथिबाट मैले केही मिलाउनुपर्ने मिलाउँछु।’
ढकाललाई बुझाएको ज्ञापनपत्रमा संघर्ष समितिले विमानस्थलको विस्तारबाट विस्थापित हुनेहरूले हाल बसेको स्थानसरह शहरी क्षेत्र र सुविधा सम्पन्न स्थानमा घरघडेरी किन्न सक्ने गरी मुआब्जा व्यवस्था गरिनुपर्ने माग राखेका छन्।
उनीहरूले विराटनगर विमानस्थल विस्तार गर्दा अधिग्रहण हुने घडेरीका लागि अधिकतम २० लाख रुपैयाँ प्रतिधुर र पक्की घरको प्रतिस्क्वायर फुट ४ हजार पाँचसय रुपैयाँ मुआब्जा मागेका हुन्।
त्यसैगरी, विमानस्थल विस्तार क्रममा पर्ने आधा घर र आधा जमिनका हकमा पूरै जमिन र पूरै घरको मुआब्जा दिनुपर्ने माग गरिएको छ।
तपाईको प्रतिक्रिया