काठमाडौं : सरकारले आजदेखि कोरोनाविरुद्धको दोस्रो चरणको खोप अभियान शुरु गरेको छ ।
स्वास्थ्य तथा जनसंख्या मन्त्रालयले माघ १४ गतेबाट विभिन्न चरणमा खोप अभियान सञ्चालन गर्ने योजनाअनुसार आजदेखि दोस्रो चरणको खोप अभियान सञ्चालन गर्न लागेको हो ।
प्रवक्ता डा.जागेश्वर गौतमले दोस्रो चरणको खोप अभियानअन्तर्गत सञ्चारकर्मी, यातायात क्षेत्रका कर्मचारी, बैंकका कर्मचारी लगायतलाई कोरोना विरुद्धको खोप लगाइने बताए ।
उनले देशभर तोकिएका खोप केन्द्रबाट कोरोना विरुद्धको खोप लगाउन सकिने भन्दै सरकारी कार्यालयबाट परिचय खुल्ने र सम्बन्धीत कार्यालयको आधिकारिक प्रमाणपत्र सहित खोप केन्द्रमा गएर खोप लगाउन सकिने प्रष्ट पारे ।
डा.गौतमले लक्षित वर्ग थपिदै जाने र सोहीअनुसार खोप लगाउँदै जाने पनि उल्लेख गर्दै दोस्रो चरण खोप अभियानमा झन्डै ३ लाख नागरिकलाई खोप लगाउने लक्ष्य राखिएको जानकारी दिए । सरकारले सुरु गरेको पहिलो चरणको खोप अभियान अन्तर्गत कोरोना विरुद्धको लडाईमा अग्रस्थानमा खटिएका स्वास्थ्यकर्मी, सुरक्षाकर्मी र सफाइकर्मीलाई गरि झन्डै एक लाख ८६ हजारभन्दा बढीले खोप लगाएका थिए । आजदेखि सुरु हुने दोस्रो चरणको खोप अभियान एक सातासम्म चल्ने छ ।
११ दिनसम्ममा देशभरिका करिब २ सय केन्द्रहरूबाट १ लाख ८४ हजार जनाले पहिलो मात्राको खोप लगाएपछि पहिलो चरणको अभियान शनिवार सम्पन्न भइसकेको छ ।
प्रकाशित :२६ माघ, २०७७
तपाईको प्रतिक्रिया