काठमाडौं, २८ फागुन । सत्तारूढ नेपाल कम्युनिष्ट पार्टी (एमाले)को केन्द्रीय कमिटीको बैठक आगामी आइतबार बस्ने भएको छ।
चैत १ गते आइतबार केन्द्रीय कमिटी बैठक बस्न लागेको केन्द्रीय कार्यालयका सचिव इश्वरी रिजालले जानकारी दिए। उनका अनुसार बैठक कति बजे, कहाँ बस्ने भन्नेबारे तोकिएको छैन।
माधव नेपाल पक्षले बालुवाटारमा बैठक बोलाइए नजाने निर्णय गरेको छ। सर्वोच्च अदालतले नेपाल कम्युनिष्ट पार्टी ऋषि कट्टेलको भएको फैसला गरेपछि एमाले ब्युँतिएको थियो। अस्तित्वमा आएपछि पहिलो पटक केन्द्रीय कमिटी बैठक बस्न लागेको हो।
बैठकमा पछिल्लो राजनीतिक परिस्थितिका साथै पार्टी सुदृढीकरणका विषयमा छलफल हुने बताइएको छ। सर्वोच्चको फैसलापछि ब्युँतिएको नेकपा एमालेले पार्टी एकीकरणपछि नेताहरूमा बढेको अविश्वास र आपसी विवादको समाधान त्यही बैठकले गर्ने बताएका छन्।
नवौं महाधिवेशनमा निर्वाचित र पछि मनोनीत गरी एमालेका २ सय ५ जना केन्द्रीय सदस्य छन्। तीमध्ये माधवकुमार नेपाल पक्षमा ९० जना छन् भने १० पद रिक्त छन्।
उपाध्यक्ष वामदेव गौतमसहित ३ जना तटस्थ बसेका छन्। प्रधानमन्त्री एवं पार्टी अध्यक्ष केपी शर्मा ओलीको पक्षमा १०२ जना केन्द्रीय कमिटी सदस्य छन्। २५ सदस्यीय स्थायी कमिटीमा १२ जना ओली र १२ जना नेपाल पक्षमा छन्। स्थायी कमिटी सदस्य सोमनाथ प्यासी प्रदेश प्रमुख भएपछि उनको ठाउँ रिक्त छ।
नेकपाको पदाधिकारीमा भने खनाल–नेपाल निकटको बर्चस्व छ। महाधिवेशनबाट चयन हुने १५ सदस्यीय पदाधिकारीमा विद्या भण्डारी राष्ट्रपति भएपछि उपाध्यक्षको एक पद खाली छ।
महाधिवेशनपछि पदाधिकारीभित्र झलनाथ खनालपछिको वरीयतामा माधव नेपाललाई राखिएको छ। त्यसैले अहिले नेकपामा एउटा उपाध्यक्ष पद खाली भए पनि नेपालसहित पदाधिकारी तहमा १५ जना छन्। तीमध्ये ९ जना खनाल–नेपाल समूहमा छन्।
चार उपाध्यक्षमध्ये भीम रावल, अष्टलक्ष्मी शाक्य र युवराज ज्ञवाली, दुई उपमहासचिव मध्ये घनश्याम भुसाल र पाँच सचिवमध्ये गोकर्ण विष्ट, योगेश भट्टराई र भीम आचार्य खनाल–नेपालतर्फ छन्।
महाधिवेशनमा ओली पक्षबाटै उपाध्यक्षमा निर्वाचित भए पनि गौतम तटस्थ छन्। ओली पक्षमा उनीसहित महासचिव ईश्वर पोखरेल, उपमहासचिव विष्णु पौडेल, सचिवहरू प्रदीप ज्ञवाली र पृथ्वीसुब्बा गुरुङ छन्।
तपाईको प्रतिक्रिया