सोलुखुम्बु , १२ चैत । रेड पाण्डाको छालासहित सोलुखुम्बु महाकुलुङबाट तीनजना पक्राउ परेका छन्। सातवटा रेड पाण्डाको छाला र पाँचवटा पासोसहित उनीहरूलाई सोमबार साँझ प्रहरी टोलीले घरैबाट पक्राउ गरेको हो।
पक्राउ पर्नेहरूमा महाकुलुङ गाउँपालिका–२ का ७६ वर्षीय जगत बहादुर राई, सोही गाउँपालिका वडा नम्बर–३ का ५६ वर्षीय कविर शंकर राई र ५७ वर्षीय मितुरधन राई रहेका छन्। पत्रकार सम्मेलन गरी प्रहरीले बिहीबार उनीहरूलाई सार्वजनिक गरेको हो।
मकालु बरुण राष्ट्रिय निकुञ्जको मध्यवर्ती क्षेत्र (बफर जोन) भित्र वन्यजन्तुको चोरीशिकार गर्ने र आखेटोपहार लुकाई–छिपाई ओसारपसार र खरिदबिक्री गर्ने गरेको भन्ने सूचनाको आधारमा पक्राउ गरिएको जिल्ला प्रहरी कार्यालय सोलुखुम्बुले जनाएको छ।
पक्राउ गरी ल्याइएका तीनै जनालाई कानुनी कारबाही निम्ति प्रहरीले राष्ट्रिय निकुञ्जमा पठाउने भएको छ।
राष्ट्रिय निकुञ्ज तथा वन्यजन्तु संरक्षण ऐन, २०२९ को दफा २६ (१) अनुसार निजहरूलाई ५ लाखदेखि १० लाख रुपैयाँसम्म जरिवाना वा पाँचदेखि १५ वर्षसम्म कैद सजाय या दुवै हुनसक्ने कानुनी प्रावधान छ।
तपाईको प्रतिक्रिया