उदयपुर, २१ चैत । नेपाल कम्युनिष्ट पार्टी (एमाले) माधव–झलनाथ पक्षका नेता सुरेन्द्र पाण्डेले केपी ओलीले गरेको कारबाहीको कुनै औचित्य नरहेको बताएका छन्। शनिबार (एमाले) माधव–झलनाथ समूहको जिल्ला कार्यकर्ता भेलालाई सम्बोधन गर्न उदयपुर आइपुगेको नेता पाण्डेले यस्तो बताएका हुन्।
अदालतको फैसलाले २०७५ जेठ अगाडिकै अवस्थामा पुर्याएकाले त्यहीँबाट बढ्नुपर्ने समेत उनले बताए। ‘वरिष्ठ नेता माधव कुमार नेपाल, उपाध्यक्ष भीम रावल, उपमहासचिव धनश्याम भुसाल र मलाई अध्यक्ष केपी ओलीले स्पष्टीकरण सोधे, त्यसको जवाफसहित प्रतिप्रश्न गरेका छौं, त्यो प्रश्नको जवाफ नदिई कारबाही गरेकोप्रति हाम्रो आपत्ति छ,’ उनले भने।
नेता पाण्डेले प्रधानमन्त्री आफैं सच्चिएर आउन अनुरोध गर्दै झ्याल र ढोका थुनेर गरेको निर्णय कुनै पनि हालतमा मान्य नहुनेसमेत बताए। यस्तै फरक प्रसंगमा राजा ज्ञानेन्द्र शाहलाई पनि प्रधानमन्त्री केपी ओली मन पर्छ भनेपछि केपी ओलीको सत्ता कता जाँदै छ भन्नेमा आशंका व्यक्त गरे। केपी ओली देशी विदेशी शक्तिको चलखेलबाट पार्टी फुटाउनुले कम्युनिष्टको अस्तित्व समाप्त गर्न खोजेको बताए। कार्यक्रममा नेकपा एमाले पोलिटब्युरो सदस्य जगनाथ खतिवडा, केन्द्रीय सदस्य बलदेव चौधरीलगायतले सम्बोधन गरेका थिए।
तपाईको प्रतिक्रिया