काठमाडौं, २१ चैत । नेकपा एमालेको वरिष्ठ नेताद्वय झलनाथ खनाल र माधवकुमार नेपाल समूहले दुईमहिने अभियानको घोषणा गरेको छ। आज बसेको खनाल–नेपाल समूहको स्थायी कमिटीको बैठकले दुईमहिने अभियानको घोषणा गर्दै तल्लो तहसम्म जाने निर्णय गरेको स्थायी कमिटी सदस्य योगेश भट्टराईले बताए।
‘आगामी दुई महिनाका लागि पार्टी संगठन निर्माण र सुदृढीकरण लागि तल्लो तहसम्म जाने निर्णय गरेका छौँ।’ उनले भने, ‘हामीले ’नेकपा एमालेको एकता बचाऔँ, कम्युनिस्ट आन्दोलनको रक्षा गरौँ’ भन्ने नाराका साथ दुई महिना अभियान चल्छ। हामीले एकताको लागि नवौँ महाधिवेशनबाट निर्वाचित भएका पदाधिकारीलाई ब्युँताउने र आवश्यकताअनुसार संगठन विस्तारका लागि नेता कार्यकर्तालाई तल्लो तहसम्म पठाउँछौँ।’ पार्टी एकताको लागि देशभर प्रशिक्षण र अन्तरक्रिया गर्नेसमेत बताए।
‘पार्टी एकता आवश्यक छ। त्यसैको लागि हामी लागिरहेका छौँ। अदालतको निर्णयअनुसार ०७५ जेठ २ गतेको अवस्थामा फर्कन अध्यक्षलाई आह्वान गरेका छौँ’ उनले भने, ‘कारबाहीलाई ठूलो कुरा मानेका छैनौँ। जेल नेल, कारबाही र निष्कासनले हामीलाई छुँदैन।’
उनले आफूहरू पार्टी एकताको लागि तत्पर रहेको बताए। ‘उहाँ (ओली) पार्टी एकताको लागि अदालतको निर्णयमा फर्किनुको विकल्प छैन। हामी विभाजनको पक्षमा छैनौँ। एकताको पक्षमा छौँ’ उनले भने।
तपाईको प्रतिक्रिया