वीरगञ्जमा पछिल्लो २४ घण्टामा थप १९० जनामा कोरोना संक्रमण पुष्टि भएको छ । जसमा ५७ जना महिला र १३३ जना पुरुषमा कोरोना संक्रमण पुष्टि भएको नारायणी अस्पतालको पीसीआर प्रयोगशालाले जनाएको छ ।
प्रयोगशालामा मंगलबार २८८ जनाको पीसीआर र एन्टिजिन विधिबाट परीक्षण गरिएको थियो । संक्रमित हुनेहरु ५ देखि ७० वर्ष उमेरसम्मका छन् । संक्रमितमध्ये पर्साका १३३ जना, बाराका ४१ जना, ७ जना सर्लाही, ५ जना रौतहट, नेपालगञ्ज, सप्तरी, महोत्तरी र धनुषाका १/१ जना रहेको प्रयोगशालाले जनाएको छ ।
त्यस्तै,, वीरगञ्जमा थप एकजना कोरोना संक्रमितको मृत्यु भएको छ । वीरगञ्ज– १० आदर्शनगर बस्ने ४० वर्षीय पुरुषको मृत्यु भएको हो ।
उपचारको क्रममा गएराति साढे ९ बजे उनको मृत्यु भएको नारायणी अस्पतालका कोभिड संयोजक डाक्टर सरोज रोशन दासले जानकारी दिए । ‘स्वास प्रस्वासमा निकै समस्या थियो, मंगलबार दिउँसो ३ बजेदेखि नै भेन्टिलेटरमा राखेका थियौं ।’ उनले भने ‘ तर बचाउन सकिएन ।’
कोरोनाका लक्षणसँग मिल्दोजुल्दो स्वास्थ्य समस्या देखिएपछि उनको पीसीआर परीक्षण गराईएको थियो । बैशाख १३ गते पीसीआर परीक्षण रिपोर्ट पोजेटिभ आएको थियो । पछि झनै गाह्रो भएपछि बैशाख १६ गते नारायणी अस्पतालमा उपचारका लागि भर्ना गरिएको थियो ।
तपाईको प्रतिक्रिया