काठमाडौं, १७ साउन । जनता समाजवादी पार्टी (जसपा) नेपालका संसदीय दलका नेतामा अध्यक्ष उपेन्द्र यादव सर्वसम्मत चयन भएका छन् ।
दलको कार्यालय सिंहदरबारस्थित शनिवार बसेको जसपा संसदीय दलको बैठकले यादवलाई सर्वसम्मत संसदीय दलका नेता चयन गरेका हुन् । यादवलाई दलको नेतामा चयन गर्न संघीय परिषद् अध्यक्ष डा. बाबुराम भट्टराईले प्रस्तावक र महेन्द्र राय यादव समर्थक रहेका थिए । बैठकमा २१ जना संघीय साँसद उपस्थित थिए । यसअघि बसेको कार्यकारिणी समितिको बैठकले आर्थिक विभाग प्रमुखको जिम्मेवारी पुनः विजय यादवलाई दिने निर्णय गरेको थियो । प्रदेश २ का आर्थिक मामिला तथा योजना मन्त्री एवम् पार्टी प्रदेश अध्यक्ष समेत रहेका नेता यादव यसअघि पनि सो विभागको जिम्मेवारी सम्हाल्दै आएका थिए । साउन ११ मा निर्वाचन आयोगबाट अध्यक्ष यादव पक्षले आधिकारिकता पाएलगत्तै संसदीय दलका नेता चयनको प्रक्रिया सुरु गरिएको थियो । यसअघि महन्थ ठाकुर पक्षले विधान विपरित राजेन्द्र महतोलाई संसदीय दलको नेता चयन गरेको थियो । संसदीय दलको नेता चयन प्रक्रियाको यादव पक्षले विरोध समेत गरेको थियो । पार्टी आधिकारिकता उपेन्द्र पक्षले पाएपछि अहिले महन्थ ठाकुर र राजेन्द्र महतो दल विहीन बनेरे संकटमा फसेका छन् । जसपाले महन्थ र राजेन्द्रसहित १६ कार्यकारिणी सदस्यलाई कारबाही गरेको छ । तर उनीहरु अझै जसपा पार्टीमै रहेको दावी गर्दै आएका छन् । शनिवार महन्थ–राजेन्द्र पक्षको बैठक बसेर नयाँ पार्टी खोल्न हतार नगर्ने निष्कर्ष निकालेका छन् ।
जसपामा नै रहेर समानान्तर गतिविधि अघि बढाउने ठाकुर पक्षले निर्णय गरेको स्रोतको दावी छ । तर अब महन्थ–राजेन्द्र पक्षले पार्टीको लेटर प्याड प्रयोग गरेपछि कारबाहीमा पर्नेछन् । महन्थ–राजेन्द्र अब न नयाँ पार्टी खोल्ने स्थितिमा छन्, न त पार्टी छाडेको औपचारिक घोषणा गर्ने स्थितिमा । नयाँ पार्टी खोलेपछि उपेन्द्र पक्षले कारबाही गर्ने सम्भावनाका कारण उनीहरु कुनै निर्णय लिन सकिरहेका छैनन् । उपेन्द्र पक्षले कारबाही गर्दा प्रतिनिधिसभा, प्रदेशसभा तथा स्थानीय तहमा निर्वाचित जनप्रतिनिधिहरुको पद समेत जान सक्छ ।
तपाईको प्रतिक्रिया