काठमाडौंमा शुक्रवारदेखि फेरि कोरोनाविरुद्धको खोप कार्यक्रम सञ्चालन हुने भएको छ ।
आइतबारसम्म सञ्चालन हुने खोप कार्यक्रममा भेरोसेल खोपको दोस्रो डोजको खोप लगाइने स्वास्थ्य मन्त्रालयले जनाएको छ ।
यसपटक ५५ वर्षभन्दा माथि उमेर समूहका नागरिक, सार्वजनिक सवारी साधनका चालक तथा सह–चालक, शिक्षक तथा प्रधानाध्यापकलाई खोपको दोस्रो डोज लगाइनेछ ।
खोप कार्यक्रम काठमाण्डौं महानगरपालिका र अन्य १० वटा नगरपालिकामा सञ्चालन हुने बताइएको छ ।
जिल्ला प्रशासन कार्यालय काठमाडौंका अनुसार ५५ वर्षभन्दा माथि उमेर समूहका नागरिक, सार्वजनिक सवारी साधनका चालक तथा सह–चालक, शिक्षक तथा प्रधानाध्यापकलाई दोस्रो डोज लगाइने छ ।
त्यस्तै,अत्यावश्यक व्यक्तिहरुको हकमा सामाखुसीस्थित राधास्वामी आइसोलेसन सेन्टर,वीर अस्पताल,नयाँ बानेश्वरस्थित निजामती अस्पताल, महाराजगञ्जस्थित त्रिभुवन विश्वविद्यालय शिक्षण अस्पताल, थापाथलीस्थित प्रसुती गृह,सशस्त्र प्रहरी अस्पताल र नेपाल मेडिकल कलेजलगायतका खोप केन्द्रहरुबाट खोप कार्यक्रम सञ्चालन गरिने बताइएको छ ।
दोस्रो मात्राको खोप कार्यक्रममा सम्पूर्ण खोप केन्द्रमा विद्युतीय दर्ता अनिवार्य गरिएको छ । खोप लगाउन जाँदा पहिलो मात्रा लगाइएको खोप कार्ड र विद्युतीय दर्ता नम्बर अनिवार्य रुपमा लिएर जानुपर्ने बताइएको छ ।
तर,विद्युतीय दर्ता नम्बर नल्याउनेले पनि फरक लाइनमा बसेर खोप लगाउन सकिने व्यवस्था मिलाइएको छ । विभिन्न परियोजनाका लागि विदेश जानेहरुले मन्त्रालयमा नाम र विवरण दर्ता गरेर आएपछि जिल्ला प्रशासनले तोकेको खोप केन्द्रमा भेरोसेल खोपको दोस्रो मात्र लगाउन पाइने बताइएको छ ।
तपाईको प्रतिक्रिया