काठमाडौं उपत्यकामा जारी निषेधाज्ञा भदौ मसान्तसम्म थप गरिएको छ ।
कोभिड–१९ सङ्कट व्यवस्थापन अध्यादेश, २०७८ को दफा ४ र स्थानीय प्रशासन ऐन, २०२८ को अधिकार प्रयोग गरी बिहीबारबाट लागू हुनेगरी निषेधाज्ञा थप गरिएको हो । उपत्यकाका तीन जिल्लाहरु काठमाडौं, ललितपुर र भक्तपुर प्रमुख जिल्ला अधिकारीहरुको बुधबार बसेको बैठकले निषेधाज्ञा थप गर्ने निर्णय गरेको हो । भिडभाड नगर्न अनुरोध गरी आदेश जारी गरिएको काठमाडौंका प्रमुख जिल्ला अधिकारीले काली प्रसाद पराजुलीले बताए । ‘पछिल्लो समय काठमाडौं उपत्यकाको संक्रमण दर हेरेर सबैजसो क्षेत्र खुलाउने निर्णय गरेका हौँ । विद्यालय सञ्चालनको हकमा नेपाल सरकारले जारी गरेको स्मार्ट लकडाउनको प्रावधानभित्र रही स्थानीय तहहरुले जिल्ला कोभिड १९ संकट व्यवस्थापन केन्द्रसँग समन्वय गरी सञ्चालन गर्न पाउँनेछन,’ पराजुलीले बताए । प्रमुख जिल्ला अधिकारी कालीप्रसाद पराजुलीद्वारा जारी आदेशमा शैक्षिक संस्थाहरू भौतिक उपस्थितिमा पठनपाठन गर्न नपाउने उल्लेख छ ।
सरकारले जारी गरेको स्मार्ट लकडाउनको प्रावधानभित्र रही स्थानीय तहहरूले डीसीसीएमसीसँग समन्वय गरी विद्यालय संचालन गर्न सकिने आदेशमा उल्लेख छ ।
अनावश्यकरूपमा मानिसहरू जम्मा हुने, भीडभाड गर्ने, सभा जुलुस गर्ने, जात्रा महोत्सव, भोजलाई प्रतिबन्ध लगाइएको छ । चाडपर्वहरू स्वास्थ्य मापदण्ड पालना गरी भीडभाड नगरी मनाउन आदेशमा भनिएको छ । यसैबीच तीनवटै जिल्लाका स्थानीय प्रशासनले काठमाडौं उपत्यकाका फिल्म हलहरु खोल्न अनुमति दिएका छन् । कोभिड प्रोटोकल पालना गर्दै फिल्म हल खुलाउन अनुमति दिने निर्णय भएको हो । काठमाडौंका प्रमुख जिल्ला अधिकारी पराजुलीले स्वास्थ्य मापदण्ड पालना गर्दै फिल्म हल खुलाउन अनुमति दिइएको बताए ।
उनले प्रशासनको आदेशको पालना भए नभएको अनुगमन गर्ने समेत निर्णय भएको जनाए । प्रशासनले निर्णय गरेपनि फिल्म हलहरु तत्काल खुल्ने अवस्था नरहेको जनाइएको छ ।
तपाईको प्रतिक्रिया