जनकपुरधाम, असोज २२ गते । प्रदेश नं. २ सरकारले दुई वटा विधेयक सर्वसम्मत पारित गरेको छ ।
शुक्रबार प्रदेशसभाको बैठकले प्रदेश पदक सम्बन्धमा व्यवस्था गर्न बनेको विधेयक २०७८ र स्वास्थ्य सेवा सम्बन्धमा व्यवस्था गर्न बनेको विधेयक २०७८ पारित गरेको हो ।
दुई महिना अघि प्रदेश सभामा पारित प्रमाणिकरणका लागि प्रदेश प्रमुखको कार्यालय पठाइएको दुबै विधेयक थप संशोधनका लागि तत्कालिन प्रदेश प्रमुख राजेश झा (अहिराज) ले सुझावसहित पुनः प्रदेश सभामा पठाएका थिए ।
उक्त सुझावहरुलाई समावेश गरी प्रदेश २ का आन्तरिक मामिला तथा सञ्चारमन्त्री भरत साहले प्रदेश पदक सम्बन्धी विधेयक र सामाजिक विकासमन्त्री नवलकिशोर साहले स्वास्थ्य सेवा सम्बन्धी विधेयक पारित गर्न आजको बैठकमा प्रस्ताव गरेपछि सभामुख सरोजकुमार यादवले दुबै विधेयक निर्णायार्थ पेश गरेको हुँदा सर्वसम्म पारित भएको छ ।
बैठकमा स्वास्थ्य विधेयक माथिको छलफलका क्रममा प्रदेश सभा सदस्यहरुले प्रादेशीक अस्पतालको अवस्था दयनीय रहेकोले उचित व्यवस्थापनका लागि सरकारलाई ध्यानाकर्षण समेत गराएका थिए
स्वास्थ्य विधेयकमाथिको छलफलकोक्रममा नेपाली काँग्रेसका शिवचन्द्र चौधरी, जसपाका रामअशिष यादव, लोसपाका रानीशर्मा तिवारी, परमेश्वर साह, एमालेका किशोरी साह लगायतले सुझाव राख्दै, प्रदेशको नाम र राजधानी चाँडो टुङ्गो लगाउनुपर्ने सुझाव समेत दिएका थिए ।
तपाईको प्रतिक्रिया