धनुषा: किसानको घर र धानमा अज्ञात समुहद्वारा आगजनि, लाखौंको क्षति

धनुषाका जनकनन्दनी गाउँपालिका– ५ का किसान सत्यनारायण मण्डलले धान राखेको घरमा अगलागी भएको छ । कसैले नियतबश आगो लगाइदिएको मण्डलको शंका छ ।

शुक्रबार राति १० बजे आगलागी भएको हो । आगलागीबाट पाँच लाखभन्दा बढीको क्षति भएको स्थानीय किशोर मण्डलले बताएका छन् । उनका अनुसार आगो लागेको कुरा थाहा पाएलगत्तै गाउँबासीले नियन्त्रणको प्रयास गरेका थियो ।

तर सम्भव भएन र धानसँगै घर तथा अन्य समानहरु पनि जलेर खरानी भएको छ । आगोले घर, धान र दमकलसहितका कृषि उपकरण जलेर नष्ट भएपछि मात्रै प्रहरी पुगेको थियो ।

आगो लगाउनेको पहिचान नभएको र अनुसन्धान भइरहेको जिल्ला प्रहरी कार्यालय धनुषाले जनाएको छ । आगो लगाएर धान, घर र कृषि उपकरणहरु जलाइदिएपछि किसान मण्डल चिन्तित बनेका छन् ।