पिछडा वर्ग ओबिसी महासंघ कुनै पार्टीमा आवद्व हुन नसक्ने दावी

जनकपुरधाममा पिछडावर्ग ओवीसी महासंघ जसपा नेपाल पार्टीमा समाहित भएको घोषणा शुक्रवार भएसंगै त्यसको विरोध हुन लागेको छ ।

महासंघकी महासचिव बबिता देवी पुर्वेले शनिवार जनकपुरधाममा एक पत्रकार सम्मेलनको आयोजना गरि पिछडा वर्ग ओबिसी महासंघ कुनै पार्टीमा आवद्व हुन नसक्ने दावी गरेकी छन् । ३६ पिछडिएका जातजातीहरुको साँझा संगठन ओबिसी कुनै पनि दलको भातृसंगठन नरहेको उनको दाबी छ । उनीहरुका अनुसार शुक्रवार जसपामा प्रवेशको भरत महतो पिछडा वर्गको अध्यक्षनै छैनन । नेतृत्व चयनका लागि भएको मतदानमा गजेन्द्र ठाकुर अध्यक्षमा विजयी भएको र सर्वोच्च अदालतबाट पनि ठाकुरलाई मान्यता दिइएको दावी गर्दै २२ करोड घोटालाको आरोप लागेका व्यक्ति कुनै पार्टीमा प्रवेश गर्दा पिछडा वर्गनै समाहित भएको भन्नु गलत रहेको बताए । उनीहरुले भ्रष्टाचार लुकाउन भरत महतो यस अघि एमालेमा पनि प्रवेश गरेको र त्याहाँ ठाँउ नपाएपछि अहिले जसपाको आड लिन खोजेको उनीहरुको आरोप छ ।