प्रधानमन्त्री शेरबहादुर देउवा नेपाली काँग्रेसको सभापतिमा पुनः निर्वाचित हुनुभएको छ ।
काठमाडौंमा जारी १४ औं महाधिवेशन अन्तर्गत सभापति पदका लागि मंगलवार भएको दोस्रो चरणको मतदानमा २७३३ मत ल्याएर देउवा सभापतिमा निर्वाचित हुनुभएको हो । काग्रेस सभापति देउवा दोस्रो कार्यकालका लागि निर्वाचित हुनुभएको हो । उहाँका प्रतिस्पर्धी शेखर कोइरालाले १८५५ मत पाउनुभएको छ ।
दिउँसो साढे ३ बजेबाट सुरु भएको दोस्रो चरणको मतदान राति साढे ९ बजे सकिएको थियो । मध्यरातमा शुरु भएको मतगणनामा देउवा निर्वाचित हुनुभएको हो ।
पहिलो चरणमा कसैले पनि ५० प्रतिशत मत कटाउन नसकेपछि दोस्रो चरणको मतदानमा गएको हो । दोस्रो चरणको मतदानमा कांग्रेसमा सभापतिका लागि शेरबहादुर देउवा र शेखर कोइराला चुनावी प्रतिस्पर्धामा हुनुहुन्थ्यो । दोस्रो चरणको मतदानमा चार हजार ५६२ मत मात्र खसेको थियो । यो पहिलो चरणको मतदानभन्दा ११७ मत कम हो । पहिलो चरणमा सभापतिको उम्मेदवार रहेका प्रकाशमान सिंह, विमलेन्द्र निधि र किरण गुरुङ तीनैजनाले दोस्रो चरणको मतदानमा देउवालाई समर्थन गर्नुभएको थियो ।
सोमवार भएको निर्वाचनको मत गणना विहीवारबाट शुरु गर्ने निर्णय भएको केन्द्रीय निर्वाचन कमिटिले जनाएको छ ।
तपाईको प्रतिक्रिया