मुख्यमन्त्री लालबाबु राउतले विश्वकर्मा लोहार जातीको अधिकार , सम्मान र पहिचानका लागी प्रदेश सरकार प्रतिबद्ध रहेको बताउनु भएको छ ।
सप्तरीको खरचुहियामा आजबाट शुरु भएको विश्वकर्मा लोहार सेवा समितिको राष्ट्रिय सम्मेलनको उद्घाटन गर्नु हुँदै मुख्यमन्त्री राउतले राज्यको उपेक्षाको शिकार भएका लोहार जातीलाई अधिकार , सम्मान र पहिचान दिलाउन प्रदेश सरकार प्रतिबद्ध रहेको बताउनु भयो ।
एउटै मुलुकमा एउटै जाति बीच फरक व्यवहार हुनु दुखद रहेको उल्लेख गर्नु हुँदै मुख्यमन्त्री राउतले पहाडका विश्वकर्मा (लोहार) ले दलितको सुविधा पाउनु र मधेशको विश्वकर्मा (लोहार)ले त्यो सुविधा बाट बंचितहुनु विभेदको पराकाष्ठा भएको जिकिर गर्नु भयो ।
पहिला दलित समुदायमा सुचिकृत लोहारलाई त्यो सूचिबाट हटाएको आपत्ति जनाउनु हुँदै मुख्यमन्त्री राउतले पुनः दलितमा सूचिकृत गराउन आफु पहल गर्ने प्रतिबद्धता समेत जनाउनु भयो ।
कार्यक्रममा भूमि व्यवस्था कृषि तथा सहकारी राज्य मन्त्री योगेन्द्र राय यादवले लोहार जातिको मुख्य पर्व विश्वकर्मा पूजामा प्रदेश सरकारले विदाको व्यवस्था गर्ने उल्लेख गर्नु हुँदै राज्य बाट विभेदको शिकार हुँदै आएको लोहार जातिलाई आफनो मुक्तिको लागी सम्मेलन बाट सशक्त रुपमा अघि बढन आग्रह समेत गर्नु भयो । विश्वकर्मा लोहार सेवा समितिका केन्द्रिय अध्यक्ष तेजनारायण ठाकुरको अध्यक्षतामा भएको उद्घाटन सत्रमा संविधान सभा सदस्य एवं भाष विद् गोपाल ठाकुर, गौर नगरपालिकाका उपप्रमुख किरण ठाकुर सहित लोहार जातीका अगुवाहरुले शुभकामना मन्तव्य राख्नु भएको थियो ।
तपाईको प्रतिक्रिया