महाराजगञ्जस्थित शिक्षण अस्पतालका ६० जना स्वास्थ्यकर्मीमा एकैपटक कोरोना संक्रमण देखिएको छ।
अस्पतालका निर्देशक डाक्टर दिनेश काफ्लेले चिकित्सक, आवासीय चिकित्सक, नर्स र अन्य कर्मचारी गरेर ६० जना स्वास्थ्यकर्मीमा कोरोना पुष्टि भएको जानकारी दिनुभयो ।
पोजेटिभ आएका सबै स्वास्थ्यकर्मी होम आइसोलेसनमा रहेको उहाँले जानकारी दिनुभयो । एक जनालाई भने वार्डमा भर्ना गरिएको उहाँले बताउनुभयो ।
स्वास्थ्यकर्मी धमाधम संक्रमित हुन थालेपछि अस्पतालको सेवा समेत प्रभावित भएको निर्देशक काफ्लेले बताउनुभयो । खाली भएको ठाउँहरूमा कसरी ड्यूटी मिलाउने भनेर छलफल चलिरहेको उहाँले जानकारी दिनुभयो ।
अस्पतालमा संक्रमणको जोखिम बढेसँगै भर्ना हुन आउने विरामीमध्ये शंकास्पदलाई होल्ड गरेर राख्न थालिएको पनि उहाँले बताउनुभयो ।
त्यसरी होल्ड गरिएका विरामीको पिसिआर नेगेटिभ आएको अवस्थामा मात्र ननकोभिड वार्डमा पठाइने, अन्यथा संक्रमण पुष्टि भए कोभिड वार्डमा राखेर उपचार गर्ने गरिएको निर्देशक काफ्ले ले जानकारी दिनुभयो ।
स्वास्थ्यकर्मीहरू उच्च जोखिम रहेको औल्याउँदै सरकारले माघ पहिलो सातादेखि स्वास्थ्यकर्मीलाई बुस्टर डोज दिने तयारी गरेको छ।
तपाईको प्रतिक्रिया