जनकपुरधाम । मुख्यमन्त्री लालबाबु राउतले संचारकर्मीहरुलाई निर्भिक भएर निश्पक्ष कलम चलाउन आग्रह गरे ।
आमसंचार प्राधिकरण मधेश प्रदेश द्वारा राष्ट्रिय समाचार समितिका मधेश स्थित समाचारदाताहरुको लागि आयोजना गरेको दुई दिवसीय अभिमुखीकरण कार्यक्रमको समापन समारोहलाई सम्बोधन गर्नु हुँदै मुख्यमन्त्री राउतले संचारकर्मीहरुले निश्पक्ष कलम नचलाएसम्म आम जनमानसले न्याय पाउन नसक्ने बताए ।
सरकारको कमिकमजोरी औल्याई सही मार्ग निर्देशन गर्ने जिम्मा संचारकर्मीहरुको रहेको उल्लेख गर्दै मुख्यमन्त्री राउतले सरकारले गरेका राम्रा र जनपक्षीय कार्यहरु जनतामा पु¥याउने जिम्मेवारी समेत संचारकर्मीहरुकै रहेको उल्लेख गरे ।
समाज परिवर्तनको जिम्मा जनप्रतिनिधिहरुको मात्र नरहेको जिकिर गर्दैै उनले सामाजिक रुपान्तरणका लागि सबै पक्ष एक जुट हुनु पर्ने धारणा व्यक्त गरे ।
प्रदेश सरकारले समाजिक रुपान्तरणका लागि गरेको जनपक्षीय कार्यहरुलाई वाईपास गर्दै नाकारात्मक प्रचार प्रसार मात्र गर्नाले प्रदेशको प्रतिष्ठा गुम्ने तर्फ सचेत गराउदै मुख्यमन्त्री राउतले त्यस तर्फ सचेत हुन आग्रह गरे ।
कार्यक्रममा आन्तरिक मामिला तथा संचारमन्त्री भरत प्रसाद साहले शासक वर्गमा अझै केन्द्रिकृत मानसिकता कायमै रहेको मधेश सरकारलाई कामगर्न समस्या भइरहेको दावी गरे ।
मधेश सरकारले समाजिक रुपान्तरणका लागि गरेको कामहरुको प्रचार प्रसार मधेश भन्दा बढी अन्य प्रदेशमा भै रहेको उल्लेख गर्नु हुँदै मन्त्री साहले प्रदेश सरकारको कामकाजको स्वामित्व सरकारले मात्र नभई प्रदेशको सबै नागरिकलाई लिन आग्रह समेत गरे ।
आमसंचार प्राधिकरणका अध्यक्ष श्याम सुन्दर यादवको अध्यक्षतामा भएको उक्त कार्यक्रममा प्रदेश सभा सदस्य रामअशिष यादव, राष्ट्रिय समाचार समितिका महाप्रवन्धक सिद्धराज राई सहितका वक्ताहरुले मन्तव्य राखेका थिए ।
तपाईको प्रतिक्रिया