सर्लाही, फागुन २३ । नेपाली कांग्रेस सर्लाही जिल्ला सभापति एवं कार्यसमितिका पदाधिकारीसहित जिल्ला नेतृत्व चयनका लागि सोमबार मतदान हुँदैछ। जिल्ला सभापति सहितको नेतृत्वका लागि संस्थापन शेरबहादुर देउवा र संस्थापन इतर शेखर कोइराला पक्षले प्यानल नै खडा गरेका छन्।
जिल्ला सभापतिमा संस्थापन पक्षबाट हालका जिल्ला उपसभापति सुरेन्द्रप्रसाद सिंह तथा संस्थापन इतरबाट पूर्व जिल्ला सभापति लक्ष्मण रायले उम्मेद्वारी दर्ता गराएका छन्।
उपसभापतिमा संस्थापन पक्षबाट दुईजना क्रमशः शेख सदहदुल्ला र डा. सरोज कुमार (राजु)को उम्मेद्वारी परेको छ भने संस्थापन इतरबाट नविन अधिकारी र रविनन्दन् चौधरी (पप्पु)को उम्मेद्वारी परेको छ। सहदुल्ला क्षेत्र नं. १ प्रदेश ख बाट प्रदेश सभा सदस्यका प्रत्यासी थिए भने क्षेत्र नं. २ का डा. सरोज जिल्ला सभापति नागेन्द्र कुमार रायका छोरा हुन्। त्यस्तै क्षेत्र नं. ३ अन्तर्गत बरहथवा निवासी अधिकारी हालका जिल्ला सचिव हुन् भने क्षेत्र नं. ४ का पप्पु तत्कालिन जिल्ला सचिव हुन्।
यस्तै सचिवमा संस्थापन पक्षबाट निरज कार्की र मनोज यादव तथा संस्थापन ईतरबाट नरेन्द्र भट्टराई र कृष्ण राज रायमाझीको उम्मेद्वारी परेको छ। त्यसैगरी सहसचिवमा संस्थापन पक्षबाट ईन्द्र योञ्जन र मनोज कुमार कुशवाहा तथा संस्थापन ईतरबाट दिनेश मिश्र र सूर्य खड्काले उम्मेद्वारी दिएका छन्। सभापति र जिल्ला कार्यसमितिको पदाधिकारीसहित ९३ पदमा हुने निर्वाचनमा हरेक पदमा दुवै पक्षबाट उम्मेदवारी परेको निर्वाचन समितिले जनाएको छ।
३ हजार दुईसय ८५ मतदाता रहेको जिल्लामा विहान ९ बजेदेखि ५ बजेसम्म सदरमुकाम मलंगवास्थित पब्लिक माविमा हुने निर्वाचन समिति सहसंयोजक धीरेन्द्र चौधरीले जानकारी दिए।
हाल दुवै पक्षले घरदैलो सहित व्यापक प्रचारप्रसार गरिरहेका छन्। गाउँगाउँका नेता एवं नेतृत्व चयनका लागि मतदाता रहेका क्षेत्रीय प्रतिनिधिहरुको घर–घरमा दुवै प्यानलका नेताहरु सहित गाडीको लावालस्कर लाग्ने गरेको छ।
नेकपा एमाले, माओवादी केन्द्र लगायत ठूला कम्युनिष्ट पार्टीहरूको प्रदेश स्तरीय अधिवेशन नै गुपचुपमा नेतृत्व चयन गरेर सकिने भएपनि कांग्रेसको भने वडा तहको अधिवेशन देखि नै नेतृत्व चयनमा प्रतिष्पर्धा एवं ठूलै तामझाम हुने गरेको छ।
जिल्ला अधिवेशन भएपछि फागुन २९ देखि ३० गतेसम्म पालिकाको अधिवेशन गर्ने सहमति भएको छ।
तपाईको प्रतिक्रिया