जनकपुरधाम, चैत ११ । मधेश प्रदेशको पर्यटकीय स्थल पर्सा जिल्लाको ठोरीमा प्रदेश मन्त्रिपरिषद्को शुक्रवार बैठक बस्ने भएको छ ।
मन्त्रिपरिषद्को बैठक साँझ बस्ने भए पनि मन्त्रीहरुको सहभागितामा ठोरीमा विभिन्न कार्यक्रमहरुको आयोजना गरिएको छ । ‘मधेश प्रदेशका लागि पर्यटकीय स्थलको प्रचुर संभावना भएको ठोरी हो’मुख्यमन्त्री लालबाबु राउतले भने, ठोरीमा पर्यटकीय विकासका लागि प्रदेश सरकारले बजेट उपलब्ध गराउँदै आएको छ ।साँझ बस्ने मन्त्रिपरिषद् को बैठकले विशेष योजनाहरुबारे निर्णय लिने उनले बताए । ठोरीमा ‘होम स्टे’ सञ्चालनमा रहेको र दिनहुँ सयौं भारतीय पर्यटकहरु पिकनिक लगायतका मनोरञ्जन गर्न आउने गरेको ठोरी गाउँपालिकाका प्रमुख प्रशासकीय अधिकृत कृष्णलाल श्रेष्ठले बताए । पर्सा जिल्लाको उत्तरी सीमामा रहेको ठोरीले भारत र नेपाललाई जोडेको छ ।चितवनबाट भारत जाने सहज मार्ग ठोरी हो ।नेकपा एमालेका अध्यक्ष समेत रहेका पूर्व प्रधानमन्त्री केपी शर्मा ओलीले भगवान राम जन्मेको स्थान पर्सा जिल्लाको ठोरी रहेको दाबी ठोकेपछि ठोरी अत्यधिक चर्चामा आएको थियो । मधेश प्रदेश मन्त्रिपरिषद्को बैठक यस अघि सर्लाही जिल्लाको सागरनाथ वन क्षेत्रमा बसेको थियो ।मुख्यमन्त्री राउत बुधवार ठोरी गएको बेला मन्त्रिपरिषद्को बैठक बस्ने घोषणा गरेका थिए ।
मधेश प्रदेश सभाको दुई महिनापछि बैठक बस्ने दिन नै मन्त्रिपरिषद्को बैठक मुख्यमन्त्री राउतले ठोरीमा राखेका छन् ।शुक्रवार नै प्रदेश सभाको बैठक बोलाइएको छ ।मन्त्रिपरिषद् बैठकमा सहभागी हुन प्रदेशका सबै मन्त्रीहरु ठोरी जाने भएकाले प्रदेश सभा बैठक औपचारिकतामा सीमित हुने संभावना छ । सबै पार्टीबाट संसदीय दलका नेताहरु प्रदेश सरकारमा रहेकाले प्रदेश सभाको बैठकमा महत्वपूर्ण विषयहरुमाथि छलफल हुने संभावना नरहेको बताइएको छ ।
तपाईको प्रतिक्रिया