काठमाडौं । देशका सातै प्रदेशका विभिन्न स्थानीय तहको प्रमुख, उपप्रमुख तथा गाउँपालिका अध्यक्ष र उपाध्यक्षमा स्वतन्त्र उम्मेदवारहरु निर्वाचित भएका छन् । निर्वाचन आयोगले सार्वजनिक गरेको मतपरिणाम अनुसार प्रदेशगतरुपमा विजयी स्वतन्त्र उम्मेदवारको अवस्था निम्न अनुरुपको छ । हालसम्म घोषणा भएका आधिकारिक विवरण अनुसार १४ पालिकामा स्वतन्त्र उम्मेदवार विजयी भएका छन् ।
प्रदेश १ मा दुई पालिका अध्यक्षमा स्वतन्त्र विजयी
प्रदेश १ अन्तर्गत भोजपुरको साल्पासिलिछो गाउँपालिका अध्यक्षमा स्वतन्त्र उम्मेदवार दाँथल कुमार कुलुङ राई विजयी भएका छन् । उनले एक हजार ८१४ मत प्राप्त प्राप्त गरे । राईको निकटतम प्रतिद्वन्द्वी नेपाली कांग्रेसको महेश राईले एक हजार ७८६ मत ल्याए ।
यसैगरी, ओखलढुंगाको मानेभञ्ज्याङ गाउँपालिका अध्यक्षमा स्वतन्त्र उम्मेदवार ज्ञानेन्द्र रुम्दाली फराकिलो मतान्तरले विजयी भएका छन् । रुम्दालीले पाँच हजार २१ मत ल्याएका छन् उनका निकटतम प्रतिद्वन्दी नेकपा (एमाले) का रुप लाल तामाङले तीन हजार ८१६ मत हुन् ।
यस प्रदेशको दुई जिल्ला अन्तर्गत दुई गाउँपालिका अध्यक्षमा स्वतन्त्र उम्मेद्वार विजयी भएका हुन् ।
मधेश प्रदेशमा एक नगरप्रमुख र उपप्रमुख दुवैमा स्वतन्त्र विजयी महोत्तरीको बर्दिबास नगरपालिका प्रमुखमा स्वतन्त्र उम्मेदवार प्रहलादकुमार क्षेत्री विजयी भएका छन् । उनले १४ हजार २१० मत ल्याएका छन् । क्षेत्रीका निकटतम प्रतिद्वन्दी नेकपा माओवादी केन्द्रका राजु खड्काले आठ हजार ३२३ मत ल्याए ।
बर्दिबास नगरउपप्रमुखमा पनि स्वतन्त्र उम्मेद्वार तारा देवी विजयी भएकी छन् । उनले नौ हजार ७३६ मत ल्याएकी हुन् । देवीले निकटतम प्रतिद्वन्द्वी माओवादी केन्द्रका कृष्ण माया गौतमले आठ हजार १८५ मत ल्याइन् ।
गण्डकी प्रदेशमा एक गाउँपालिका उपाध्यक्षमा स्वतन्त्र विजयी
मनाङ्गको मनाङ ङिस्याङ गाँउपालिका उपाध्यक्षमा स्वतन्त्र उम्मेदवार छिरिङ गुरुङ ७४४ मतसहित विजयी भएका छन् । गुरुङको निकटतम प्रतिद्वन्द्वी कांग्रेसका रिन्जेन धोर्जे गुरुङले ७१९ मत ल्याए ।
कर्णाली प्रदेशमा दुई नगरप्रमुख, तीन गाउँपालिका अध्यक्ष र एक उपाध्यक्षमा स्वतन्त्र उम्मेदवार
जुम्लाको चन्दननाथ नगरपालिका प्रमुुखमा स्वतन्त्र उम्मेद्वार राजु सिंह कठायत दुई हजार ४०३ मतसहित विजयी भए ।
यसैगरी, कालिकोटको खाँडचक्र नगरप्रमुखमा स्वतन्त्र उम्मेदवार कमल बहादुर शाही दुई हजार ९१९ मतसहित विजयी भएका हुन् । उनका निकटतम प्रतिद्वन्दी कांग्रेसका पदमबहादुर शाहीले दुई हजार ३४१ मत प्राप्त गरे ।
यसैगरी, डोल्पाको डोल्पो बुद्ध गाउँपालिका अध्यक्षमा कार्मा छोइवेल गुरुङ, कालिकोटको सान्नी त्रिवेणी गाउँपालिका अध्यक्षमा मोहनबहादुर केसी र हुम्लाको चंखेली गाउँपालिका अध्यक्षमा प्यारी लाल शाही विजयी भएका छन् । उनीहरु तीनै जना स्वतन्त्र उम्मेदवार हुन् ।
यसैगरी, डोल्पाको शे फोक्सुन्डो गाउँपालिका उपाध्यक्षमा स्वतन्त्र उम्मेदवार पेम्मा वाङछेन गुरुङ विजयी भएकी छन् ।
सुदूरपश्चिम प्रदेशमा एक गाउँपालिका अध्यक्ष, एक उपमहानगर प्रमुख र एक नगरप्रमुख स्वतन्त्र
धनगढी उपमहानगरपालिका प्रमुखमा स्वतन्त्र उम्मेदवार गोपाल हमाल निर्वाचित भएका छन् । उनले २६ हजार ८६५ मत प्राप्त गरेका छन् । उनका निकटतम प्रतिद्वान्दी गठबन्धनका तर्फबाट नेपाली काँग्रेसका उम्मेदवार नृपबहादुर वडले १४ हजार ८१७ मत प्राप्त गरे ।
बाजुराको बुढीनन्दा नगरउपप्रमुखमा स्वतन्त्र उम्मेद्वार रामबहादुर बोहरा विजयी भएका छन् । बोहोराले चार हजार ७७ र उनका निकटतम प्रतिद्वन्द्वी कांग्रेसका रिता देवी सिंहले तीन हजार ६७७ मत प्राप्त प्राप्त गरिन् ।
यसैगरी, बैतडीको डीलासैनी गाउँपालिका अध्यक्षमा सन्तोष प्रकाश जोशी तीन हजार १८९ मतसहित विजयी भएका हुन् ।
तपाईको प्रतिक्रिया