बर्दिया । बर्दियाको खाता जैविक मार्गलगायत आसपासका क्षेत्रमा वन्यजन्तुको आक्रमण बढेको भन्दै आन्दोलनमा उत्रिएका आन्दोलनलाई नियन्त्रणमा लिने क्रममा प्रहरीके गोली लागी एकजनाको मृत्यु भएको छ ।
प्रदर्शनकारीलाई हटाएर सडक खुलाउने क्रममा गोली चल्दा मधुवन नगरपालिका वडा नं.२ को १८ बर्षिया नविना थारुको मृत्यु भएको स्थानीय कृष्ण परियारले जानकारी दिए । स्थानीयले गुलरिया राजापुर सडक खण्डको ओराली बजारमा सडक बन्द गरेपछि प्रहरी परिचालन गरिएको थियो ।
सोमबार बिहान मधुवन नगरपालिका–२ छोट्की सोनाहा गाउँकी ४१ वर्षीया अस्मिता थारुलाई चितुवाले आक्रमण गरी घाइते बनाएपछि स्थानीयले सडक बन्द गर्दै सुरक्षाको माग गरेका थिए । घाइते अस्मिताको नेपालगञ्जमा उपचार भइरहेको छ ।
मृतक नविनाको शव अहिले बर्दिया अस्पतालमा राखिएको छ । गोली लागेर घाइते भएका एकजनाको नेपालगञ्जमा उपचार भरहेको स्थानीयको भनाइ छ । केही दिनअघि सोही क्षेत्रमा पाटेबाघको आक्रमणमा परी मधुवन नगरपालिका–२ की कौसिला पालको मृत्यु भएको थियो ।
वन्यजन्तुको आक्रमण नरोकिएपछि स्थानीय समुदायहरु सडक आन्दोलनमा उत्रिएको खाता सामुदायिक वन समन्वय समितिका अध्यक्ष हरी गुरुङले बताए । खाता क्षेत्रका बाघ स्थानान्तरण गरिनुपर्ने, वनमा तारजाली गर्नुपर्ने र समुदायको सुरक्षा हुनुपर्ने माग स्थानीयको छ ।
तपाईको प्रतिक्रिया