जनकपुरधाम उपमहानगरपालिका परिसरभित्र फुटपाथमा अव्यवस्थित रुपमा राखिएका बजार हटाउने निर्णय भएको छ ।
जनकपुरधामका नगर प्रमुखको अध्यक्षतामा शुक्रबार कार्यापालिकाको सभा हलमा बसेको बैठकमा फुटपाथ अव्यवस्थित रुपमा लगाइएका बजार सूचना जारी गरी हटाउने निर्णय सो बैठकबाट पारित भएको हो ।
पहिलो चरणमा राम मन्दिर र जानकी मन्दिरको वरिपरि, महाबीर चौकदेखि पेठिया बजारसम्मका फुटपाथमा राखिएको व्यापारीक सामाग्री हटाइने र यसलाई निरन्तरता दिने समेत बैठकमा भनिएको छ ।
नगर प्रमुख साहको अध्यक्षतामा बसेको बैठकमा ट्राफिक व्यवस्थापन, छाडा चौपाया व्यवस्थापन, फोहोर व्यवस्थापनलगायतका विभिन्न विषयमा छलफल गरी प्रथम चरणमा फुटपाथका बजार हटाइने निर्णय भएसँगै यस कार्यलाई आगामी दिनमा पनि निरन्तरता दिने समेत भनिएको छ ।
प्रमुख साहले बैठकमा उपस्थित समाजका अगुवा, वृद्धिजीवी, विभिन्न क्लवका प्रतिनिधि, संघ संस्थाका अध्यक्ष, प्रहरी प्रशासन, ट्राफिक प्रहरीका प्रमुखलगायतको उपस्थितिमा भएको छलफलबाट सो निर्णय गरेका हुन् । जनकपुरधामलाई सफा, सुन्दर स्वच्छ बनाउनु छ भने एकल प्रयासले सम्भव नहुँने बताउँदै सबैलाई निरन्तरता दिन आग्रह समेत गरे ।
नगर प्रमुख साहका अनुसार छाडा चौपाया व्यवस्थापनको लागि काँजी घर निर्माणको प्रकृया अघि बढेको छ, यातायात व्यवस्थापनका लागि तत्काल अस्थायी रुपमा कुनै स्थानलाई प्रयोग गर्ने बताउँदै त्यसको स्थायी स्थान पनि चाँडो व्यवस्थ गर्ने उनले बताए ।
धनुषाका प्रहरी नायव उपरीक्षक एव प्रवक्ता दिपककुमार रायले यस्ता प्रयास विगतका दिनमा पनि भएको तर, निरन्तरता दिन नसक्दा कार्यान्वयन हुन सकेन ।
यसैगरी धनुषाका ट्राफिक प्रहरी प्रमुख चन्द्र भुषण यादवले ट्राफिक व्यवस्थापनका लागि निरन्तर प्रयासरत रहेको पनि जनाए र आगामी दिनमा पनि निरन्तरता दिने उनले भने ।
जनकपुरधामलाई व्यवस्थित बनाउन बैठकमा उपस्थित उपप्रमुख किशोरी साह लगायतले आफ्नो राय सल्लाह तथा सुझावहरु दिएका थिए ।
तपाईको प्रतिक्रिया