माफी माग्न लगाएको रिसमा हत्या, दुई जना पक्राउ

धनुषाको मिथिला विहारी नगरपालिका ४ कजरा रमौलका ५३ वर्षीय प्रभु यादवको हत्या भएको छ ।

विहीबार राति दुई पक्षीय विवाद भएपछि उनको हत्या भएको छ । स्थानीय सुरज यादव लगायत उनको परिवारले धरिलो हतियार प्रहार गरी बुवाको हत्या गरिदिएको मृतकको कान्छो छोरा अशोक कुमार यादवले बताए । उनका अनुसार विहीबार राति दुई महिना अगाडि पञ्चायतको विषय जोडेर विवाद भएको थियो । सोही विवादमा प्रभुको श्रीमती महजनी देवी यादव, जेठो छोरा जगन्नाथ यादव, माइलो संतोष यादव र कान्छो अशोक घाइते भएका छन् । महाजनीको हात भाचिएको छ । सन्तोषको दुई वटा औला काटिएको छ । टाउकोमा १९ वटा टाका लागेको छ भने कान्छो र जेठो सामान्य घाइते भएका छन् ।

अहिले प्रभुको शव पोस्ट मार्टमका लागि प्रादेशिक अस्पतालमा राखिएको छ । उनको कान्छो छोरा अशोकका अनुसार दुई महिना पहिले सुरजको बाख्राले प्रभुको लौका (सजमन)को बोट खाएको थियो । सोही विषयमा गाली गलौज गर्दा विवाद भएको थियो । विवाद समाधान गर्न गाउँमै छिमेकीहरुको उपस्थितिमा पञ्चायत राखिएको थियो । पञ्चायतले सुरजलाई माफी मागेर विवाद समाधान गर्न सुझाएको थियो । त्यही रिसमा दुई महिना पछि विहीबार राति पनि दुबै पक्षबीच विवाद भएको थियो । विवाद उग्र रुप लिएपछि भीडमा धरिलो हतियार प्रहारबाट घटनास्थलमै प्रभुको मृत्यु भएको थियो ।