जनकपुरधाम, फागुन १२ गते । मधेश प्रदेश सरकारका भूमिव्यवस्था, कृषि तथा सहकारी मन्त्री इन्जिनियर बसन्त कुशवाहाले जनगुनासोलाई चिर्दै काम गरेको बताए ।
शुक्रबार आफ्नो एक महिने कार्यप्रगति विवरण सार्वजनिक गर्दै मन्त्री कुशवाहाले पवगतका दिनमा मन्त्री प्रति जनताको गुनासोलाई चिर्दै आफू कार्यालय समयभित्र मन्त्रालय पुग्ने गरेको बताए ।
मधेश प्रदेशमा कृषकका लागि कम्तिमा ३ लाख मेट्रिक टन मलखादको आवश्यकता रहेकोमा १ लाख मेट्रिक टन मात्रै पाउने गरेकोले अब यस आर्थिक वर्षदेखि कम्तिमा पनि साढे २ लाख मेट्रिक टन उपलब्ध गराइने उनले बताए ।
उनले आफ्ना मातहतका सबै २७ वटै कार्यालयमा सरसफाइ, कार्यालय व्यवस्थापनलगायत कर्मचारीहरु समयमै कार्यालय आउने गरेको दाबीसमेत गरे । साथै किसान कार्डका लागि दर्ता प्रक्रिया सुरु गरिसकेको र कृषि मिटरका लागि पनि निःशुल्क प्रक्रिया जारी रहेको उनले बताए ।
मन्त्री कुशवाहाले कृषि विद्युतिकरण पनि सुरु भइसकेको बताउँदै मन्त्रालय र यस मातहतका कार्यालयहरुमा १२२ जना स्थायी कर्मचारी आवश्यक रहेकोले कर्मचारी पदपूर्तिका लागि मधेश लोकसेवा आयोगसँग समन्वय गर्ने काम जारी रहेको बताए ।
तपाईको प्रतिक्रिया