जनकपुरधाम, चैत २ गते । धनुषामा स्कुल भ्यानले ठक्कर दिँदा एक बालकको मृत्यु भएको छ ।
मृत्यु हुनेमा जिल्लाको सबैला नगरपालिका–१३ किरतपुर बस्ने अनिल यादवका ३ वर्षीय छोरा अभिराज यादव रहेको प्रहरीले जनाएको छ ।
सबैला नगरपालिका–१२ रघुनाथपुरमा सञ्चालित इन्टरनेशनल बोर्डिङ स्कुलको भ्यानले ठक्कर दिँदा बालक यादवको मृत्यु भएको जिल्ला प्रहरी कार्यालय धनुषाका प्रवक्ता प्रहरी नायव उपरीक्षक वेदप्रसाद गौतमले जानकारी दिए ।
बिहीबार बिहान १० बजे विद्यार्थी लिन गइरहेको अवस्थामा प्रदेश–२–०२–००१ च ००८४ नम्बरको स्कुल भ्यानले रघुनाथपुर चोकमा बालक यादवलाई ठक्कर दिएको थियो ।
ठक्करबाट घाइते भएका बालकलाई उपचारका लागि प्रादेशिक अस्पताल जनकपुर ल्याइएकोमा उपचारको क्रममा मृत्यु भएको डीएसपी गौतमले जानकारी दिए ।
तपाईको प्रतिक्रिया