मन्त्रालय बाँडफाँडमा गठबन्धनभित्रै विवाद, आज पनि मन्त्रिपरिषद् विस्तार नहुने

काठमाडौं, चैत १६ गते । दस दलीय गठबन्धनभित्र मन्त्रालय बाँडफाँडको कुरा नमिलेपछि आज हुने भनेको मन्त्रिपरिषद् विस्तार अनिश्चित बनेको छ। बालुवाटार स्रोतका अनुसार गठबन्धनभित्रका दलहरूले मन्त्रालय बाँडफाँडमा असहमति जनाएपछि मन्त्रिपरिषद् विस्तार नहुने भएको हो।
चितवनबाट फर्किएलगत्तै प्रधानमन्त्री पुष्पकमल दाहाल प्रचण्डले दलका नेताहरूसँग छुट्टाछुट्टै छलफल गरेका थिए। उनले द्विपक्षीय र त्रीपक्षीय छलफल गरे पनि भागबण्डामा कुरा नमिलेको स्रोतको भनाइ छ। बुधबार बिहानै चितवन पुगेरका प्रधानमन्त्री प्रचण्डले आज साँझसम्म मन्त्रिपरिषद् विस्तार हुने बताएका थिए।
बुधबार बसेको गठबन्धन दलको बैठकले भने मन्त्रालयको संख्या टुंगो लगाएको थियो। जसअनुसार कांग्रेसले ८, माओवादीले ५, जसपा र नेकपा एकीकृत समाजवादीले २–२ र जनमत, लोसपा, नेसपा, नागरिक उन्मुक्ति र आम जनता पार्टीले एक–एक मन्त्रालय दिने सहमति भएको थियो।