जनकपुरधाम, चैत १६ गते ।मधेश प्रदेशका मुख्यमन्त्री सरोजकुमार यादवसँग नेपालका लागि संयुक्त राज्य अमेरिकाका राजदूत डीन थोम्पसनले बिहीबार भेटवार्ता गरेका छन् ।
जनकपुरधामस्थित मुख्यमन्त्री तथा मन्त्रिपरिषद् कार्यालयमा आयोजित कार्यक्रममा मुख्यमन्त्री यादवले मधेश प्रदेशका शिक्षा, स्वास्थ्य र कृषिलाई प्रमुख प्राथमिकतामा राखेर मिलेर काम गर्न आग्रह गरे । प्रदेशमा कृषिका लागि सिँचाइ, रासायनिक मलको उद्योग आवश्यक रहेको उनले सुझाएका थिए ।
मुख्यमन्त्री यादवले अमेरिका सरकार मधेश प्रदेश सरकारसँग विकासमा साझेदारी गर्न तयार रहेको सुन्दा खुसी लागेको बताए ।
संयुक्त राज्य अमेरिकाका राजदूत थोम्पसनले नेपाल–अमेरिकाबीचको सम्बन्ध ७५ औँ वर्ष पूरा गर्दा उत्साहजनक रहेको बताए ।
मधेश प्रदेशको भौतिक पूर्वाधार विकास, शिक्षा, स्वास्थ्य, जलवायु परिवर्तन लगायतको क्षेत्रमा सहयोग गर्न तयार रहेको उनले जानकारी गराए । उनले भने, ‘‘मानव संशोधन शाखाले रोजगारमा कसरी सहयोग गर्न सक्छ, हामी सोचिरहेका छौँ ।’’
युएसआइडीका प्रतिनिधिले प्रदेशमा समुदायमा आधारित कार्यक्रमहरू सञ्चालनमा रहेको जानकारी गराउँदै अब सिँधै प्रदेश सरकार र स्थानीय सरकारमार्फत कार्यक्रम सञ्चालन गर्नुपर्ने सुझाव दिएका थिए ।
यस्तै , सोही दिन जनकपुरधाम उपमहानगरपालिकाका प्रमुख मनोजकुमार साहलगायत वडा अध्यक्षहरुसँग पनि भेट गरी छलफल गरेका थिए ।
तपाईको प्रतिक्रिया